Фарғонада ҳамшираларнинг тез ёрдам машинасини юваётгани ҳақидаги хабар юзасидан расмий изоҳ берилди

Фарғона вилоят соғлиқни сақлаш бошқармаси «Дарё»да эълон қилинган мақолага муносабат билдириб, ҳамшираларнинг тез ёрдам машинасини ювиши ҳақидаги гапни рад этди. Аммо шифокорлар ва ҳамширалар ювиниш хонасидаги муаммони тан олиб, бартараф қилди.

2016 йилда штатлар жадвалидаги ўзгаришларга кўра, тез ёрдам бригадаларидаги мавжуд санитарлик ўринлари қисқартирилган. Санитар ходимларнинг маълум вазифалари, жумладан, тез ёрдам машиналарини ювиш меъёрий ҳужжатларга кўра ҳайдовчилар зиммасига юклатилган. Бу иш учун ҳайдовчиларга 30 фоиз устама тўланади.

Соғлиқни сақлаш вазирлигининг тегишли буйруғига кўра, автомашина ичида зарур санитария-гигиена ва эпидемияга қарши тадбирларни таъминлашга навбатда турган ҳамшира масъул қилиб белгиланган.

Маълумки, тез ёрдам машинасида шошилинч ёрдам кўрсатиш учун зарур 34 хил тиббий ускуна, 36 хил дори-дармон жойлашган. Ҳар бир ҳамшира мазкур тиббий жиҳозлар ва дори-дармонларни тартибга келтириб, ускуналарни тозалаб, зарарсизлантириб, ўзидан кейинги навбатчи ҳамширага топшириши керак.

Бундан шундай хулосага келиш мумкинки, ҳамширанинг тез ёрдам машинасининг бошқа қисмларини ювишга мажбурланаётгани ҳақидаги гаплари асоссиздир.

Бўлимда тиббиёт қўлқоплари, ниқоблар ва бир марталик ҳимоя кийимлари ортиғи билан захира қилиб қўйилган.

Апрель ойи бошида бўлимга 3 минг дона тиббий ниқоб олиб келиниб, ходимларга мунтазам тарқатиб борилмоқда. Карантин эълон қилингач, вилоят санитария-эпидемиология осойишталик маркази томонидан бир марталик ҳимоя кийимлари ва кўзойнаклар доимий етказиб берилган.

Ҳозирда юқори тана ҳарорати билан мурожаат қилган барча беморлар ва карантиндаги фуқаролар хонадонига ходимлар фақат махсус ҳимоя кийимида жўнатилмоқда.

Бўлимда шифокор ва ҳамширалар учун алоҳида хоналар ажратилган.

Мурожаатчининг фақатгина битта фикри ўринли. Бўлимда ювиниш хонаси мавжуд бўлса-да, вақтинча ишламай турганди. Бу муаммо ҳозир бартараф этилиб, ювиниш хонаси таъмирланди ва ишга туширилди.

Фарғона вилоят соғлиқни сақлаш бошқармаси

Эслатиб ўтамиз, «Дарё»га шикоят қилган фарғоналик ҳамшира Республика шошилинч тиббий ёрдам илмий маркази Фарғона филиали тез тиббий ёрдам марказий бўлимида ҳамширалар тез ёрдам машинасини ювишга мажбурланишини билдириб, «Бўлимда машиналарни ювиш учун етарли шароит йўқ. Машина ювган кийимимизда ноилож чақирувга ҳам борамиз, беморлар билан мулоқотда бўламиз. Бу гигиена қоидаларига тўғри келмайди-ку. Бўлимда ювиниш хонаси йўқ. Кийим алмаштириш учун алоҳида хона ажратилмаган,» — деганди. Вазиятга изоҳ берган бўлим мудири Рамзжон Мирзараҳимов эса ҳамшираларнинг машина ювишини тасдиқлаганди.