АҚШ президенти Дональд Трамп нефть соҳасини қўллаб-қувватлаш учун қўшимча маблағ ажратишга ваъда берди. У бу ҳақда Twitter’даги аккаунтида маълум қилган.
«Биз АҚШнинг буюк нефть ва газ соҳасини уялтириб қўймаймиз. Энергетика вазири Дэн Бруйетт, молия вазири Стивен Мнучинга ушбу муҳим компанияларни қўллаб-қувватлаш ва улардаги иш ўринларини сақлаб қолиш учун зарур маблағ ажратиш режасини ишлаб чиқиш бўйича топшириқ бердим», — деб ёзган Трамп.
20 апрель куни Американинг WTI маркадаги нефтининг май ойи учун фьючерс нархи баррель учун 40 долларга пастлади. Котировкаларнинг қулаши нефть сақлаш жойларининг тўлиб қолгани билан боғлиқ.
Мавзуга доир:
Аввалроқ Оқ уйда ҳали ишлаб чиқарилмаган нефть учун ҳақ тўлаш режалаштирилаётгани маълум қилинганди. Ҳукумат нефть захираларини компаниялардан сотиб олиб, ишлаб чиқармасликни сўраши мумкин. Режадаги чора нефть сақлаш жойларининг тўлиб қолмаслиги ва ярим йил ичида бозордаги ортиқча нефтдан қутулиш имконини бериши тахмин қилинмоқда.
Апрелда Америка нефтни қайта ишлаш заводларига етказиб бериладиган қора олтин ҳажмини тўрт карра оширган Саудия Арабистони нефтининг мамлакатга импортини чеклаш ҳам таклиф қилинган.
Изоҳ (0)