Хитойлик олимлар коронавируснинг оғирроқ шакли борлигидан огоҳлантирди

Хитойнинг Чжэцзянь университети олимларининг аниқлашича, SARS-CoV-2 коронавируси келтириб чиқарадиган COVID-19 касаллиги патогеннинг штаммига қараб касаллик оғирроқ ёки осонроқ кечиши мумкин. Уларнинг тадқиқот натижалари MedRxiv порталида эълон қилинган.

Тадқиқот доирасида улар Ханчжоудан бўлган 11 нафар тасодифий бемордан намуналар олиб, коронавирус мутациясини ўрганган. Ўрганиш жараёнида улар турли штаммларнинг инсон ҳужайраларига қанчалик тез кириб бориши ва уларни нобуд қилиши мумкинлигини аниқлаган.

Натижада, касаллик қўзғатувчи тажовузкор штаммлар мавжудлиги тасдиқланди, уларнинг вирус юки энг заиф штаммларга қараганда 270 бараваргача юқори бўлиши мумкин.

Шу билан бирга, олимлар коронавируснинг заифроқ мутациялари улар келтириб чиқарадиган касалликдан ўлим хавфи даражасини камайтирмаслигидан огоҳлантирган.

Олимларнинг қайд этишича, синовда иштирок этган беморларда топилган коронавируснинг энг агрессив штаммлари Италия ва Испаниядаги беморларда ҳам аниқланган. Энг заиф, лекин кенг тарқалган штамм эса АҚШдаги беморларда қайд этилган.

Аввалроқ Пекин университети олимлари COVID-19 инфекциясини келтириб чиқарадиган коронавирус бутун дунё бўйлаб тарқалиш жараёнида эволюцион ўзгаришларга учраганини маълум қилганди. Франциялик олимлар коронавирус қандай ҳароратда бутунлай йўқ бўлишини аниқлаган.