Бухоро вилоятининг Когон туманида намунавий лойиҳа асосида қурилган уйнинг ҳовли девори қулаб тушди. Бу ҳақда «Дарё»га шикоят қилган Бахтиёр Бозоровнинг айтишича, мазкур муаммо туман ҳокимлиги-ю, прокуратуранинг эътиборсизлиги оқибатида содир бўлган.
Воқеани ўрганган «Дарё» мухбири Лайло Ҳайитованинг ёзишича, муаммо қурувчи ташкилот айби билан юзага келган.
Когон тумани Тараққиёт қишлоқ фуқаролар йиғини ҳудудидаги 400 дан ортиқ нумунали уй-жой «Қишлоқ қурилиш инвест» МЧЖ Бухоро вилоят филиали томонидан қурилган бўлиб, 2017—2018 йилларда фойдаланишга топширилган.
Бахтиёр Бозоров ушбу манзилдан 2018 йил уй харид қилади. Аммо янги уйнинг бир талай муаммолари борлиги сабаб ҳали кўчиб ўтмаган.
«‘Қишлоқ қурилиш инвест’ МЧЖ Бухоро вилоят филиалининг 2018 йил 13 августдаги кредит шартномасига кўра, барча мажбуриятларимни тўлиқ бажариб келяпман. Янги уйдаги камчиликларни якунлаганимдан сўнггина, кўчиб ўтаман дегандим. Бироқ, ҳали кўчиб улгурмасимдан уй девори қулаб тушди», — дейди Бахтиёр Бозоров.
Мурожаатчининг таъкидлашича, уй деворининг қулашига қўшни томонидан қурилиш қоидаларига зид равишда ертўла қазилиши сабаб бўлган.
«Деворимиз ёнидан ертўла қазилаётгани, ертўла қазилган жойдан сув чиқиб, тўпланиб қолиши деворга зарар беришини айтиб, 2019 йилнинг 12 ноябрь куни Когон туман ҳокимлигига, 22 ноябрда эса туман прокуратурасига мурожаат қилдим. Мурожаатимга эътибор беришмади. Оқибатда ҳали кўчиб ўтмаган уйимнинг деворлари қулади», — дейди Бахтиёр Бозоров.
Фуқаро уйининг ҳовли девори қулашига сабаб бўлган ертўла 16х12 метр квадрат ўлчамда икки метргача қазилган бўлиб, ерости зах суви чиқа бошлаган. Ёмғир сувлари ҳам шу чуқурликда тўпланган. Оқибатда жорий йилнинг апрель ойида фуқаро уйининг деворлари қулаб тушган. Ҳосил бўлган кўлмак бошқа қўшнилар уйининг пойдеворига ҳам шикаст етказган.
Когон тумани ҳокими ўринбосари Шерзод Хўжаев мазкур ҳолатни изоҳлар экан, ҳокимлик вакиллари муаммони ечиш учун манзилга бир неча марта келганини, ҳатто фуқаро Бахтиёр Бозоровга мазкур масала икки фуқаро ўртасидаги муаммо эканлигини, уй-жойининг деворларига талофат етказган фуқарони судга бериши лозимлигини тушунтирганини билдирди.
«Биттаси қазиса, иккинчисининг уйи тагини сув босиб, девори қуласа, фуқаролик судига мурожаат қилмайдими? Юз марта айтдим, аммо ‘бордим, қабул қилмади’, — дейди. Қандай қабул қилмайди?» — дейди ҳокими ўринбосари.
Суриштирув давомида сув чиққан ертўла 2017 йилнинг 22 декабрь куни Когон туман ҳокими қарори билан «Ҳукуматобод» маҳалласида яшовчи имконияти чекланган фуқаро Дилфуза Ғаффоровага уй-жой қуриш учун берилганлиги маълум бўлди.
Тўрт фарзанднинг онаси Дилфуза Ғаффорова эса уй-жой қуришга қурби етмаслиги боис, қурувчи ташкилот раҳбари Облоқул Бозоровдан кўмак сўрайди.
Кузатувларимизга кўра, Дилфуза Ғаффорова номига уй-жой қуриш учун ажратилган ер майдонида катта кучланишли иккита трансформатор мавжуд бўлиб, темир тўсиқлар билан ўралмаган. Атрофи хавфсизлантирилмаган. Шу боис ҳам бу ерда тикланиши лозим бўлган 32-рақамли уй ҳудуднинг бошқа бурчагида тикланган ва фойдаланишга топширилган.
«Қўни-қўшниларимизнинг огоҳлантиришига қарамай, ертўлани ковлаб, қўшниларимиз деворига зарар етказилгани ва трансформаторларнинг хавфсизлантирилмагани жуда ёмон. Ушбу муаммо юзасидан туман мутасаддиларига кўп мурожаат қилганмиз. Ёғингарчилик кунларида трансформаторлардан чарсиллаб олов чиқади. Унинг атрофида ток уриб ўладиган ит, мушуклар ҳақида-ку, гапирмаса ҳам бўлади. Ахир шу атрофда фарзандларимиз ўйнайди. Юрагимизни ҳовучлаб яшаймиз», — дейди шу ҳудудда яшовчи фуқаро Ойгул Хондорова.
Кам таъминланган оиланинг яшаши учун ажратилган икки сотихли ер майдонига пойдевор қуриб бериш масъулиятини зиммасига олган «Баҳром-Олим мангу» қурилиш ташкилоти раҳбари Облоқул Бозоров 2019 йилнинг ноябрь ойидан бери кунлар ёғин-сочинли келгани, ковланган ўрадан зах сув чиққани сабаб ҳалигача ерни намсизлантириш имкони бўлмаганини билдирди.
«Бизнинг хатомиз билан сув чиқди. Фақатгина ҳавонинг совуқ ва намлиги, ёғингарчиликнинг кўплиги етмагандек, зах сувларининг тўхтамай чиққани муаммони ўз вақтида бартараф этишимизга тўсиқ бўлди. Аксига олиб, қўшнининг девори ағдарилиб тушганидан жуда ҳижолатдамиз. Зараримиз тегди. Лекин сув сўрилмаса, уни ўша пайтнинг ўзида кўмсак, яна сув чиқиш эҳтимоли бор. Шунинг учун вақт керак бўлди. Қўни-қўшниларга етказилган барча зарарни қоплаймиз, тузатиб берамиз. Бу ҳақда мутасадди раҳбарларга ҳам, туман прокуратурасига ҳам билдирганмиз», — деди Облоқул Бозоров.
Қурувчи ташкилот раҳбарининг маълум қилишича, ушбу муаммо 10 кун ичида бартараф этилади.
Қурувчи сўзларининг исботи сифатида ўша куни манзилга техника воситаларини келтирди. Ковланган ўра атрофига қум ва шағал ётқизилди.
Изоҳ (0)