Шавкат Мирзиёев: «Саховат ва кўмак» умумхалқ ҳаракати янги тарихимиз саҳифаларидан мустаҳкам ўрин олади

Ўзбекистон Президенти Шавкат Мирзиёев 20 апрель куни бўлиб ўтган йиғилишда «Саховат ва кўмак» умумхалқ ҳаракатини йўлга қўйиш ташаббусини илгари сурган эди. Президент ташаббусига кўра, пандемия шароитида эҳтиёжманд фуқароларга ва оилаларга ёрдам берган корхоналар ва тадбиркорларга давлат томонидан бир қатор имтиёзлар ва преференсиялар берилади.

«Имкониятидан келиб чиқиб, қайсидир тадбиркор бир ойда мисол учун 10 та, бошқа бири эса 20 та оилага кўмаклашиши, энг муҳими муҳтож оилалар аъзоларини ишга жалб қилиши мумкин. Давлат томонидан бундай тадбиркорларга солиқ, лизинг, кредит тўловлари, зарур ресурслар билан таъминлаш бўйича турли имтиёз ва преференсиялар берилади. Яъни бу аҳолига давлат томонидан тадбиркорлик субъектлари орқали кўрсатиладиган саховат ва кўмак бўлади», — деган эди давлат раҳбари.

Шавкат Мирзиёев 22 апрель, чоршанба куни, глобал инқироз ва пандемия шароитида мамлакат аҳолиси бандлиги масалаларига бағишлаб ўтказилган видеоселектор йиғилишида мазкур ташаббус юзасидан ўз фикрларини билдирди.

Ҳозирги оғир пайтда аҳолимизнинг ёрдам ва кўмакка муҳтож қатламларини аниқ, манзилли асосда қўллаб-қувватлаш мақсадида ‘Саховат ва кўмак’ умумхалқ ҳаракатини йўлга қўйиш ҳақидаги ташаббусни халқимиз, жамоатчилигимиз кўтаринки руҳда, қизғин кутиб олгани барчамизни, албатта, хурсанд қилади.

Бу масала бўйича муҳтарам фахрийларимиз, олимлар, маданият ва санъат арбоблари, ҳурматли уламоларимиз, бизнес ҳамжамият вакиллари, ёшларимиз томонидан телевидение ва рўзномаларда, ижтимоий тармоқларда билдирилаётган фикрлар, самимий муносабат бундай эзгу интилиш халқимизнинг юрагида, қалбида мужассам эканини яққол тасдиқлайди.

Бу самимий фикр-мулоҳазалар эл бошига иш тушган қийин дамларда бир-бирига елкадош бўлиш, бир-бирига эътибор ва ғамхўрлик кўрсатиш каби энг олижаноб фазилатлар халқимизнинг юрагида, қалбида азалдан мужассам бўлганини, бугун ушбу интилишлар янада кучлироқ жўш ураётганини намоён этади.

Шу маънода, улуғ шоир ва мутафаккир Алишер Навоий бобомизнинг ‘Саховатли инсоннинг бошига жаннат дарахтлари соя солади’ деган сўзларида чуқур ҳикмат бор, албатта.

Мен, мана шу ташаббусни чин дилдан қўллаб-қувватлаб, бу савобли ишга муносиб ҳисса қўшаётган барча ватандошларимизга, саховатли тадбиркорларимизга муқаддас китобларимизда айтилган: ‘Яхшиликнинг мукофоти — фақат яхшиликдир’, деган гапни яна бир бор эслатмоқчиман.

Албатта, эҳтиёжманд, кам таъминланган инсонлар ва оилаларга меҳр ва ҳурмат билан ёрдам қўлини чўзадиган барча тадбиркорлар ва фермерларга, хўжалик бирлашмалари вакилларига, вазирлик, идора ва ташкилотларнинг ишчи-ходимларига бу қилган яхшиликлари бир неча бор зиёда бўлиб қайтади.

Таъкидлаб айтаман: ўз навбатида, давлатимиз, жамиятимиз саховатпеша тадбиркорларни ҳар томонлама қўллаб-қувватлайди. Уларга ҳеч қандай оғирлик тушмайди.

Шу маънода, ‘Саховат ва кўмак’ умумхалқ ҳаракати давлатимиз ва халқимиз бирлигини, унинг беқиёс қудратини ёрқин намоён этиб, янги тарихимиз саҳифаларидан мустаҳкам ўрин олади, деб ишонаман.

Шавкат Мирзиёев, Ўзбекистон Президенти

Президент Шавкат Мирзиёев 22 апрель куни бўлиб мазкур видеоселекторда Ўзбекистон халқини Рамазон билан табриклади ва коронавирусга қарши курашаётган шифокорлар ва куч тузилмаларига миннатдорчилик билдирди. Шунингдек, Ўзбекистоннинг вирусдан холи ҳудудлардаги бир қатор саноат корхоналарида, қурилиш майдонларида, фермер ва кластер хўжаликларида санитар-эпидемиологик нормаларга қатъий амал қилган ҳолда ишлар аста-секин бошланганини маълум қилди.