Хориждаги ўзбекистонликларни олиб келувчи янги чартер рейсларини ташкил қилиш бўйича алоҳида қарор қабул қилинади

Айни пайтда хорижий давлатларда бўлиб турган ва ватанга қайтиш истагидаги Ўзбекистон фуқароларини олиб келиш бўйича чартер рейсларини ташкил қилиш масаласида Республика махсус комиссиясининг алоҳида қарори қабул қилинади. Бу ҳақда Ўзбекистон Ташқи ишлар вазирлиги хабар берди.

Вазирлик томонидан Республика махсус комиссияси коронавирус инфекцияси кенг тарқалишининг олдини олишга қаратилган барча чеклов чораларини 2020 йил 10 майга қадар узайтирганини таъкидлаб ўтган.

Шу билан бирга, Ўзбекистондаги хорижий фуқароларга берилган виза муддатлари жорий йилнинг 1 июнига қадар автоматик тарзда узайтирилади. Муайян муддатга визасиз кириш ҳуқуқига эга бўлган давлатлар фуқароларига, белгиланган муддат тугаган тақдирда, истисно тариқасида мамлакатдан чиқиб кетишга жорий йилнинг 1 июнига қадар рухсат берилади, уларга нисбатан жавобгарлик чоралари қўлланилмайди.

Қайд этилишича, янги чартер рейслар ташкил этиш тўғрисидаги Республика махсус комиссиясининг қарори, шунингдек, чартер рейсларининг санаси ва йўналишлари тўғрисида расмий манбалар орқали қўшимча равишда маълумот берилади.

Аввалроқ хорижий давлатларда бўлиб турган ва ватанга қайтиш истагини билдирган Ўзбекистон фуқароларининг рўйхати тузилаётгани ҳақида хабар берилган эди.

Коронавирус сабабли Россияда оғир ҳаёт шароитларига тушиб қолган ўзбекистонликларга ёрдам бериш учун «Саховат» маркази ташкил этилди. Шунингдек, Туркиянинг Истанбул шаҳрида оғир вазиятга тушиб қолган ўзбекистонликларга ёрдам акцияси уюштирилгани хабар берилган эди.

Ўзбекистон Ташқи ишлар вазирлиги ҳамда Сенат раиси Танзила Норбоева Россиядан ўзбекистонлик мигрантлар масаласида ёрдам сўраганди. Россия президенти Владимир Путин 18 апрель куни меҳнат муҳожирларининг иш патенти муддати 15 июнгача узайтириш тўғрисида фармон имзолади.