Жаҳон соғлиқни сақлаш ташкилоти (ЖССТ) коронавирус келиб чиқиши ҳайвонларга бориб тақалади, деб ҳисобламоқда. Бу ҳақда ЖССТнинг расмий вакили Фадела Чаиб Женевада ўтказилган брифингда маълум қилган.
«Мавжуд барча далиллар ушбу вирус ҳайвонлардан келиб чиққанлигини кўрсатмоқда. Вирус яратилмаган, у билан лаборатория тажриба ўтказилмаган. Катта эҳтимол билан унинг экологик манбаи кўршапалаклардир. Бироқ вирус қандай йўл билан одамга юққанини аниқлаш зарур», — деган у ва ҳозирча бунга сабаб бўлган «ўртакаш» топилмаганини таъкидлаган.
Фадела Чаибнинг айтишича, ЖССТ вируснинг келиб чиқишини аниқлаш борасида барча мамлакатларнинг саъй-ҳаракатларини қўллаб-қувватлайди. Айни пайтда бу борада мутахассисларнинг бир неча гуруҳи иш олиб бормоқда. «Барчамиз назарияга эмас, балки фактларга эътибор қаратишимиз керак», — деб таъкидлаган у.
Эслатиб ўтамиз, январь ойи охирида АҚШ республикачи-сенатори Том Коттон коронавируснинг сунъий равишда яратилганини тахмин қилган ва Хитойда ягона 4-даражадаги, дунё бўйича энг хавфли патоген миркоорганизмлар устида ишловчи суперлаборатория мавжудлигини билдирганди.
Бундан ташқари, Fox News телеканали ҳам коронавируснинг Уханда лаборатор шароитда яратилганини тахмин қилган. Телеканал коронавируснинг кутилмаганда институт ходимларидан бири тасодифан инфекцияни юқтириб олиши оқибатида тарқалиб кетган бўлиши мумкинлиги ҳақидаги гипотезани илгари сурган.
Нобель мукофоти соҳиби Люк Монтанье ҳам вируснинг Ухандаги лабораторияда ишлаб чиқилгани ҳақида фикр билдирган.
Хитой Ташқи ишлар вазирлиги вакили Чжао Лицзян эса ушбу тахминларга жавобан Жаҳон соғлиқни сақлаш ташкилоти коронавируснинг сунъий синтез оқибатида пайдо бўлганлигини тасдиқламаганини қайд этган. Ухань вирусология институти раҳбари Юань Чжимин бугунги кун олимлари янги турдаги коронавирусдек вирусни сунъий тарзда яратиш учун етарли билимга эга эмас, деб айтган.
Пентагон COVID-19 коронавируси лаборатория шароитида эмас, балки табиий усулда келиб чиққан деб ҳисобламоқда, аммо разведкада бу борада якуний хулосалар йўқ.
Изоҳ (0)