Шимолий Осетия (Россия Федерацияси таркибидаги республика) пойтахти Владикавказ шаҳрида изоляция режими сабабли қийин аҳволда қолган аҳоли 20 апрель куни оммавий норозилик ўтказди. «РБК»нинг хабар беришича, унда бир ярим мингдан ортиқ киши иштирок этган.
Қайд этилишича, улар ҳукуматдан республикада амалда бўлган ўз-ўзини изоляция қилиш режимидан жабрланганларни қўллаб-қувватлашни ҳамда Шимолий Осетия раҳбари Вячаслав Битаровни истеъфога чиқариш, унинг ўрнига вақтинчалик раҳбар тайинлашни сўраган.
«Нима бўлган тақдирда ҳам бу чиқиш ноқонуний эди, бу биринчидан. Энг муҳими эса, бу эпидемиологик жиҳатдан салбий оқибатлар келтириб чиқариши мумкин», — деган Россия президенти матбуот котиби Дмитрий Песков. Шу билан бирга, одамлар гапига диққат билан қулоқ тутиш ҳам муҳимлигини таъкидлаган.
Унинг айтишича, ҳукумат жойлардаги ижтимоий-иқтисодий вазиятни кузатмоқда. «Албатта, коронавирус пандемияси билан боғлиқ вазият бизнинг мамлакатимизни ҳам четлаб ўтмади. Иқтисодий ҳаётнинг барча иштирокчилари қийинчиликларни бошдан кечирмоқда. Шубҳасиз, қийин, айниқса ҳозир, ўз-ўзини изоляция қилиш даврида қийин», — деган у.
Хабарда айтилишича, намойишчилар билан учрашган Вячаслав Битаров республиканинг кам таъминланган аҳолиси ва COVID-19 коронавирус инфекциясининг тарқалиши сабабли ишсиз қолганларга зарур ёрдам кўрсатилишини ваъда берган.
Шимолий Осетияда маҳаллий ҳокимлик қарорига биноан, (айрим истиснолардан ташқари) чакана савдо дўконлари ва бозорлар, умумий овқатланиш корхоналари, гўзаллик салонлари, массаж салонлари, ҳаммомлар, сауналар 30 апрелгача тўхтатилган. Шунингдек, жисмоний тарбия ва спорт объектлари, клублар, тўгараклар ва сайёҳлик марказлари вақтинча ёпилган.
Изоҳ (0)