АҚШда коронавирусни даволаш бўйича 70 дан ортиқ турли усулдан фойдаланилмоқда. Бу ҳақда президент Дональд Трампга таяниб, «РИА Новости» хабар берди.
«Ҳозирда АҚШда 72 та фаол синовлар ўтказилмоқда, ўнлаб терапевтик усуллар ва даволаш йўллари тадқиқ қилинмоқда, яна 211 таси режалаштириш жараёнида. Гап даволаш ва вакциналар ҳақида кетмоқда», — дейди президент.
Трампнинг ўзи ҳам даволаш усулларини афзал кўришини, бу одамларга тезроқ ёрдам беришини билдирган.
Аввалроқ тиббиёт ходимлари коронавирусга қарши вакцинани яратиш пандемия бошланганидан ҳисобланса 12—18 ой вақт олишини маълум қилганди.
Сўнгги маълумотларга кўра, АҚШда коронавирусга чалинганларнинг умумий сони 787 мингдан ошиб кетди. Америкалик олимларнинг сўзларига кўра, коронавирусга чалинганлар сони расмий рақамлардан ўн баравар кўп бўлиши мумкин.
Эслатиб ўтамиз, март ойи охирларида Британиядаги hVIVO тадқиқот гуруҳининг коронавирусга қарши вакцина ишлаб чиқиш ва шунга ўхшаш вирусни юқтириш дастурида иштирок этишга 20 мингдан ортиқ одам рози бўлган. 6 апрель куни Туркияда коронавирусга қарши вакцина ҳайвонларда муваффақиятли тест қилинган. Британияда эса ҳали клиник синовдан ўтказилмаган коронавирус вакцинасини оммавий ишлаб чиқариш бошланиши маълум бўлди.
Изоҳ (0)