“O‘zgidromet” hafta davomida kuzatiladigan ob-havo ma’lumotini e’lon qildi

“O‘zgidromet” xabariga ko‘ra, bu haftada ham O‘zbekistonga Erondan issiq va quruq havo oqimi kirishi davom etadi.

Dushanbadan jumagacha janubiy oqim kuchayadi, ya’ni issiq havo respublika hududini qamrab oladi.

O‘zbekiston hududining katta qismida havo vaqti-vaqti bilan o‘zgarib turadi, yog‘ingarchilik bo‘lmaydi. Harorat kechasi 17-22 daraja atrofida, 20—22-aprel kunlari kunduzi 25-30 daraja, 23—24-aprel kunlari 27-32 daraja, janubda va cho‘l zonasining ayrim joylarida 33-34 daraja issiqqacha ko‘tariladi, bunday haroratlar shu davr uchun xos bo‘lgan me’yoriy qiymatlardan 6-8 darajaga yuqoridir.

Xabarda qayd etilishicha, aprelning shu kunlari uchun maksimal harorat rekordlari 32-34 darajani, janub va cho‘l zonalarida esa 35-37 darajani tashkil qiladi.

Faqat respublikaning shimoliy hududlariga haftaning ikkinchi yarmida g‘arbiy Qozog‘istondan nisbatan salqin va kam nam havo oqimi kirishni boshlaydi. 23-aprel kuni Qoraqalpog‘istonning ayrim joylarida qisqa muddatli yomg‘ir yog‘ishi mumkin. Harorat pasayib, 24-aprel kuni kechasi 7-12, kunduzi 17-22 daraja iliq bo‘ladi.