Самарқандда қўшниларини ҳақорат қилган маст фуқаро ва ИИБ ходимларидан қочган Damas ҳайдовчиси 15 суткага қамалди. Бу ҳақда «Дарё» мухбири хабар бермоқда.
2020 йилнинг 5 апрель куни тахминан соат 21:00 атрофида Самарқанд тумани «Қуйи Чордара» маҳалласида яшовчи 28 ёшли фуқаро С.Н. спиртли ичимлик истеъмол қилган ҳолда қўшниларининг дарвоза ва деразаларини тақиллатиб, ҳеч бир сабабсиз уятли сўзлар билан ҳақорат қилган.
Қўшнилари тинчлигини бузиб, майда безорилик ҳаракатларини содир қилган С.Н. Маъмурий жавобгарлик тўғрисидаги кодекснинг 54-моддаси 1-қисми (Эпидемияларга қарши кураш қоидаларини бузиш) ва 183-моддаси (Майда безорилик)да назарда тутилган ҳуқуқбузарлик ҳаракатларини содир қилганликда айбланиб, 1 миллион 115 минг сўм миқдорида жаримага тортилди ва 15 сутка маъмурий қамоқ билан жазоланди.
Шунингдек, 10 апрель куни мазкур туманда яшовчи 19 ёшли фуқаро Р.О. бошқарувчидаги Damas’ида «Оқмачит» маҳалласидаги блокпостда хизмат вазифасини ўтаётган ИИБ ходимларининг қонуний талабларини бажармасдан, воқеа жойидан қочиб кетган.
Р.О.нинг автомашинаси тўхтатилиб текширилганда, карантинда транспорт воситасидан фойдаланиш ҳуқуқини берувчи махсус рухсатномаси йўқлиги аниқланган. Бу ҳам етмагандек, ҳайдовчи ИИБ ходимларини ваколатидан чиқишда айблаб, оммани ИИБ ходимларига қарши даъват этган.
Самарқанд туман маъмурий суди ҳуқуқбузар Р.О. ишини кўриб чиқиб, уни Маъмурий жавобгарлик тўғрисидаги кодекснинг 54-модда 2-қисми (Эпидемияларга қарши кураш қоидаларини бузиш), 194-модда 1-қисми (Ички ишлар органлари ходимининг қонуний талабларини бажармаслик) ва 195-модда (Ички ишлар органлари ходимларининг ўз хизмат бурчларини бажаришларига қаршилик кўрсатиш)лари билан айбли деб топиб, 5 миллион 575 минг сўм жарима ҳамда 15 сутка маъмурий қамоқ билан жазолашни лозим топган.
Изоҳ (0)