Андижон вилояти юқумли касалликлар шифохонасида навбатдаги 2 нафар коронавирусга чалинган бемор бутунлай соғайди. Улар 20 апрель куни вилоят соғлиқни сақлаш бошқармаси масъуллари иштирокида реабилитацияга кузатилди. Бу ҳақда Соғлиқни сақлаш вазирлиги хабар берди.
Тузалганлардан бири, 39 ёшли аёл Хўжаобод туманидан бўлса, иккинчиси 51 ёшли аёл Андижон шаҳридан. Ҳар икки бемор ҳам коронавирус инфекциясига чалинган беморлар билан мулоқотда бўлиб, касалликни ютириб олган.
Андижон вилоят юқумли касалликлар шифохонасидан шу пайтгача тузалиб чиққан беморлар сони 13 нафарга етди.
Шунингдек, Бухоро вилояти кўп тармоқли тиббиёт марказида 11 нафар коронавирус инфекциясига чалинган бемор буткул соғайди. Улар ҳам 20 апрель куни вилоят соғлиқни сақлаш бошқармаси масъуллари иштирокида реабилитацияга кузатилди.
Шифо топганларнинг барчаси жорий йил 25 март куни чартер рейс билан Россиядан Бухорога олиб келинган ва карантинга олинган. Коронавирус инфекцияси тасдиқлангач, улар вилоят кўп тармоқли тиббиёт марказига жойлаштирилган. Улардан 10 нафари эркак, 1 нафари аёл. Беморларнинг 4 нафари Қашқадарё вилоятидан, 2 нафари Фарғона вилоятидан, Тошкент, Бухоро, Наманган, Самарқанд вилоятлари ҳамда Тошкент шаҳридан бўлган 1 нафардан фуқаро касалликдан соғайган. Улар орасида энг каттаси 54 ёшда бўлса, энг кичиги 20 ёшда.
Бухоро вилояти бўйича шу пайтга қадар коронавирусдан тузалганлар сони 68 нафарга етди. Айни пайтга Ўзбекистон бўйлаб коронавирус инфекциясидан жами 238 нафар бемор тўлиқ соғайди.
Вазирликнинг маълум қилишича, 20 апрель куни мамлакатдаги қатор тиббиёт муассасаларида коронавирус инфекциясидан соғайган беморларнинг реабилитацияга кузатилиши кутилмоқда.
Ўзбекистонда 20 апрель соат 14:30 ҳолатига кўра, коронавирус инфекциясини юқтириб олганлар сони 1582 нафарни ташкил этмоқда.
Ўзбекистонда 15 мартдан бери беш киши эса инфекция асоратлари оқибатида вафот этди. Бундан ташқари, хорижда 73 ўзбекистонлик коронавирусга чалинган, уларнинг тўрт нафари вафот этган.
Эслатиб ўтамиз, Ўзбекистонда карантин тартиби 10 майга қадар узайтирилди, Республика махсус комиссияси карантин даври учун янги тартибларни эълон қилди.
Изоҳ (0)