Тошкентда автомашинада ҳаракатланиш ҳуқуқини берувчи стикерларни ноқонуний қўлга киритган шахсларга жиноят иши қўзғатилди. Бу ҳақда Бош прокуратура матбуот котиби Ҳаёт Шамсутдинов маълум қилди.
Тошкент шаҳар Миробод туманида рўйхатдан ўтиб, улгуржи савдо турига эга бўлган «Д.Ф.» МЧЖ мансабдор шахслари мансаб ваколатларини суиистеъмол қилиб, карантин қоидаларига зид равишда 7 нафар шахсни ишга қабул қилиш ҳақида буйруқларни расмийлаштириб, Давлат хизматлари марказидан карантин даврида автомашинада ҳаракатланиш ҳуқуқини берувчи стикерларни ноқонуний олишга эришганлиги аниқланган.
Шу каби яна 9 та маъсулияти чекланган жамиятнинг мансабдор шахслари жами 18 та ҳолатда стикерларни ноқонуний қўлга киритгани аниқланган.
Мазкур ҳолатлар юзасидан 17 апрель куни Миробод туман прокуратураси томонидан Жиноят кодексининг 192-11, 257-1 ва 228-моддалари (Нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш, Меҳнатни муҳофаза қилиш қоидаларини бузиш ҳамда Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилган.
Ҳозирда тергов ҳаракатлари олиб борилмоқда.
Аввалроқ Ички ишлар вазирлиги матбуот котиби Шоҳрух Ғиёсов махсус стикери бор автомобиль эгаларининг барча ҳужжатлари тўлиқ бўлиши кераклигини маълум қилганди.
Мавзуга доир:
Изоҳ (0)