Мудофаа вазирлиги: «Бир ойлик хизматга пулини тўлаб қўйган фуқароларнинг пуллари қайтариб берилмайди»

«Бир ойлик хизматга пулини тўлаб қўйганлар нима қилишади? Карантин қачонгача чўзилиши номаълум бўлса, биз пулимизни ҳозир қайтариб олсак бўладими?», — дея берилган саволга Мудофаа вазирлиги ахборот хизмати раҳбари Баҳром Зулфиқоров қуйидагича жавоб берди. Бу ҳақда Ахборот ва оммавий коммуникациялар агентлиги ҳузурида ташкил этилган штабда бўлиб ўтган брифингда маълум қилинди.

Бир ойлик хизматга, яъни сафарбарлик чақируви резервидаги ҳарбий хизматни ўташ учун пул бадалини тўлаб қўйган фуқаролар 27 ёшга тўлгунга қадар сафарбарлик чақируви резервидаги бир ойлик хизмат йиғинини ўташлари мумкин. Шунинг учун карантин муддати тугагандан сўнг, албатта, бир ойлик хизмат йиғинига жалб қилинадилар тўлов қилган пул бадали қайтириб берилмайди.

Баҳром Зулфиқоров, Мудофаа вазирлиги ахборот хизмати раҳбари 

Ўзбекистонда коронавирус билан боғлиқ ҳолат яхши томонга ўзгаргандан сўнг ҳарбий хизматга чақирув ишлари давом эттирилиши айтилди.Фақатгина Ўзбекистон Республикаси Вазирлар Маҳкамасининг 2003 йил 22 февралдаги 99-сонли қарор билан киритилган низомга мувофиқ бу хизмат тури учун тўланган пул бадаллари қуйидаги ҳолатларда:

• фуқаро ҳарбий хизматга яроқсиз деб топилганда;
• тиббий-меҳнат экспертиза комиссияси томонидан 27 ёшгача I, II ёки III гуруҳ ногиронлиги берилган ҳолатда;
• сафарбарлик чақируви резерви хизматчиси вафот этганда;
• махсус ҳисоб рақамга янглишиб ёки ортиқча пул бадаллари ўтказилган ҳолатда пул бадаллари белгиланган тартибда қайтариб берилиши белгиланганлиги маълум қилинди.

Эслатиб ўтамиз, февраль ойининг охирида «Ўзбекистон Республикаси фуқароларининг муддатли ҳарбий хизматга навбатдаги чақируви ҳамда белгиланган хизмат муддатини ўтаб бўлган ҳарбий хизматчиларни Қуролли Кучлар резервига бўшатиш тўғрисида»ги Президент қарори қабул қилинган эди. Ўзбекистонда 2020 йилдан бошлаб 18 ёшдан 27 ёшгача бўлган йигитлар бир йиллик муддатли ҳарбий хизматга бориши қатъиян белгиланган. Бундан ташқари, олий маълумотли фуқаролар ҳам 12 ой ҳарбий хизматни ўтайдиган бўлган.