“Fuqarolarning o‘zini o‘zi boshqarish organlari to‘g‘risida”gi O‘zbekiston Respublikasi qonuni loyihasi Normativ-huquqiy hujjatlar loyihalari muhokamasi portaliga muhokama uchun joylashtirildi.
Ushbu qonun loyihasida fuqarolar yig‘inining raisi (oqsoqoli)ni saylash muddati uch yildan besh yil muddatga almashtirilishi belgilangan.
Amaliyotda qo‘llanib kelingan, biroq qonunchilikda aks etmagan bir qator tushunchalar, xususan, qonun loyihasida ko‘chaboshi — fuqarolar yig‘ini hududidagi ko‘chalarning geografik joylashuviga qarab, aholining umumiy yig‘ilishida saylangan va ular nomidan fuqarolar yig‘inida faoliyat olib boradigan, ularning qonuniy manfaatlarini ifoda etadigan fuqaro sifatida, uyboshi — fuqarolar yig‘ini hududidagi ko‘p kvartirali uylarning geografik joylashuviga qarab, aholining umumiy yig‘ilishida saylangan va ular nomidan fuqarolar yig‘inida faoliyat olib boradigan, ularning qonuniy manfaatlarini ifoda etadigan fuqaro deya ta’riflangan.
Eslatib o‘tamiz, 2020-yil 18-fevralda O‘zbekiston Prezidentining “Jamiyatda ijtimoiy-ma’naviy muhitni sog‘lomlashtirish, mahalla institutini yanada qo‘llab-quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari to‘g‘risida”gi farmoni qabul qilingan, mazkur hujjat bilan fuqarolar yig‘ini raisi o‘rinbosari — ijtimoiy va ma’naviy-ma’rifiy masalalar bo‘yicha maslahatchi, fuqarolar yig‘ini raisi o‘rinbosari — tadbirkorlik, tomorqa yer egalari faoliyatiga ko‘maklashish va obodonlashtirish ishlari bo‘yicha maslahatchi, fuqarolar yig‘ini raisi o‘rinbosari — yoshlar masalalari bo‘yicha maslahatchi, fuqarolar yig‘ini raisi o‘rinbosari — keksalar va faxriylar ishlari bo‘yicha maslahatchi lavozimlari tugatilgan hamda fuqarolar yig‘ini raisining huquq-tartibot masalalari bo‘yicha o‘rinbosari, fuqarolar yig‘ini raisining oila, xotin-qizlar va ijtimoiy-ma’naviy masalalar bo‘yicha o‘rinbosari, fuqarolar yig‘ini raisining obodonlashtirish, tomorqa va tadbirkorlik masalalari bo‘yicha o‘rinbosari, oila va xotin-qizlar masalalari bo‘yicha mutaxassis, fuqarolar yig‘ini raisining yoshlar masalalari bo‘yicha maslahatchisi, fuqarolar yig‘ini raisining keksalar va faxriylar ishlari bo‘yicha maslahatchisi lavozimlari tuzilmaga kiritilgandi.
Qonun loyihasining 20, 21 va 22-moddalarida ularning vakolatlari, huquqlari va majburiyatlari keltirib o‘tilgan.
Qonun loyihasining matnida “fuqarolar yig‘ini” tuzilma sifatida, “fuqarolar yig‘ini kengashi” esa fuqarolar yig‘inining kollegial organi sifatida qo‘llanilmoqda.
Avvalroq O‘zbekiston Mahalla va oilani qo‘llab-quvvatlash vazirligi huzuridagi “Mahalla va oila” ilmiy-tadqiqot institutining faoliyatini tashkil etish rejalashtirilayotgani xabar qilingandi.
Izoh (0)