Чехия президенти мамлакат чегараларини бир йил очмасликни таклиф қилди

Чехия президенти Милош Земан маҳаллий радиостанциялардан бирига берган интервьюсида коронавирус қайтадан авж олмаслиги учун фуқароларнинг чет элга чиқишига тақиқни яна бир йилга узайтириш лозимлигини билдирди. Бу ҳақда Ceske Noviny хабар бермоқда.

Унинг фикрича, ёзги таътил пайтида фуқаролар чет элга бориши шарт эмас, яхшиси Чехия манзараси гўзаллигидан баҳраманд бўлган маъқул. Президент шахсан ўзи дам олиш учун мамлакат жануби-шарқида жойлашган Височина ўлкасига боришини айтган.

Земаннинг фикрича, чегаралар очилса, одамлар инфекцияланиш даражаси юқори бўлган мамлакатга бориб, Чехиядаги эпидемиологик вазиятни янада ёмонлаштириши мумкин.

Шу тариқа у мамлакат соғлиқни сақлаш вазири Адам Войтехнинг чекловларни қисман олиб ташлаб, коронавирусга чалиниш даражаси нисбатан кам бўлган давлатлар: Словакия ва Хорватияга бориш таклифига ҳам жавоб берди. Бироқ бу масала май ойидан сўнггина кўтарилишини таъкидлаган.

Ўз навбатида сайёҳлик компаниялари ҳукуматдан чегаралар очилишининг ҳеч бўлмаса, тахминий санасини айтишларини сўрамоқда. Чехия туризм ассоциацияси вице-президенти Ян Папеж ҳукумат, шу жумладан, Болгария, Греция, Таиланд, Вьетнам ёки Мальдив оролларига боришга ҳам рухсат берса бўларди, деб ҳисобламоқда.

Эслатиб ўтамиз, Чехия ўз чегараларини 16 мартдан бошлаб бутунлай ёпган. Фуқаролар фақат махсус рухсатнома орқалигина мамлакатни тарк этиши мумкин.

Сўнгги маълумотларга кўра, эпидемия бошланганидан буён Чехияда 6787 киши коронавирусга чалинган, 1298 киши тузалган, 188 киши вафот этган. Мамлакатда эпидемиянинг авж палласи март ойи охирлари — апрель ойи бошларига тўғри келаган. Ўша вақтда кунида 300 дан ортиқ киши касалланган. Касалланиш эпицентри Прага шаҳри бўлиб, у ерда умумий ҳисобда 1590 киши касалланган.

Охирги бир сутка давомида Чехияда 140 киши коронавирусга чалинган.