Ахборот ва оммавий коммуникациялар агентлигида ўтган брифингда Бош прокуратура вакили Фарҳод Очилов бозорларда нархларнинг асоссиз ошиб кетишига қарши иқтисодий таъсир инструментларининг натижаларини келтириб ўтди.
Жумладан, арзонлаштирилган кўчма ярмаркалари орқали 1—17 апрель кунлари ҳудудий прокуратура, департамент органлари ва бошқа ташкилотлар ҳамкорлигида 28 490 та (бугун, 19 апрелда 2 664 та) кўчма савдо ярмаркаси ташкил этилиб, 27 турдаги жами 31 765 тонна (3 028 тонна) озиқ-овқат маҳсулотлари арзон нархларда сотилиши таъминлангани айтилди.
Шунингдек, бозорда муайян маҳсулотнинг нархи ошиш эҳтимоли пайдо бўлиши билан унинг миқдорини кўпайтирган ҳолда интервенсия қилиш доирасида 15 март — 17 апрель кунлари республика бўйича:- 16 000 тонна картошка;
- 5 200 тонна пиёз;
- 3 700 тонна сабзи;
- 400 тонна карам;
- 460 тонна товуқ гўшти;
- 1150 тонна гўшт;
- 8,3 млн дона тухум;
- 1 350 тонна гуруч;
- 540 тонна шакар;
- 120 тонна олма ишлаб чиқарувчилар нархида интервенсия қилингани айтилди.
Мавзуга доир: Бош прокуратура: «1095 та ҳолатда 2 млрд сўмдан ортиқ маҳсулотларни қиммат сотиш аниқланган»
«Ўртакашлар бўғинини истисно қилиб, ‘биринчи қўл’ тамойили асосида нархларни арзонлаштириш имконини берувчи механизм асосида Янгийўл ва Бекобод туманларининг марказида замонавий типда қурилган, аммо 2018 йилдан буён фаолият кўрсатмаётган, шунингдек, Қибрай тумани марказида муқаддам бозор сифатида фаолият юритиб, бўш ётган бозор фаолияти қайта тикланиб, уларга тадбиркорларнинг жалб этилиши таъминланган», — дейди Фарҳод Очилов.
Шунингдек, деҳқон бозори мавжуд бўлмаган, Зангиота туманининг «Эшонгузар» МФЙда доимий ишлайдиган йирик савдо ярмаркаси ташкил қилиниб, 27 турдаги озиқ-овқат ва қишлоқ хўжалиги маҳсулотларини арзон нархларда сотиш йўлга қўйилгани маълум қилинди.
Натижада, 410 та тадбиркорлик субъектининг фаолияти йўлга қўйилиб, ушбу туманларда яшовчи 705,9 минг аҳолининг озиқ-овқат маҳсулотларини харид қилиш учун ортиқча оворагарчилик билан боғлиқ муаммолари ҳал этилгани айтилди.
Аввалроқ Бош прокуратура мурожаатида карантин даврида аҳолини асосий турдаги озиқ-овқат маҳсулотлари, дори-дармон ва тиббий буюмлар билан узлуксиз таъминлаш, нарх-навони барқарор сақлаш чоралари кўрилишини билдирилган эди.
Изоҳ (0)