Скутери жарима майдончасига қўйилган «доставкачилар» жаримани тўлаб, транспортни олиб кетиши мумкинлиги айтилди

АОКА ҳузурида ташкил этилган штабдаги Ички ишлар вазири матбуот котиби Шоҳрух Ғиёсов карантин қоидаларини бузган транспортлар жарима майдончасига қўйилиши, маҳсулот ташиш масалаларига тўхталиб ўтди. Бу ҳақда «Дарё» мухбири хабар бермоқда.

Жумладан, фуқаролар ўзига тегишли бўлган скутерда карантин қоидаларини бузиб ҳаракатлангани учун, Санитария эпидемиология назорати ходимлари томонидан тегишли тартбида баённома расмийлаштирилиб, транспорт воситаси вақтинчалик жарима майдонига қўйилган бўлса, белгиланган миқдорда жарима тўлаб, скутерни олиб чиқиб кетиши мумкинлиги айтилди.

«Шу билан бирга қайд этиш керакки, сизда етказиб бериш хизматини амалга оширишингиз учун тегишли тартибдаги махсус лицензияга эга бўлишингиз талаб этилади», — дея қўшимча қилди матбуот котиби.

Бундан ташқари, махсус комиссиянинг 2020 йил 11 апрелдаги 18-сон баёнига кўра, етиштирилган қишлоқ хўжалиги маҳсулотларини бозорга ёки озиқ-овқат дўконларига етказиб беришда рухсатнома талаб этилмаслиги, маҳсулотларни М1 ёки М2 тоифадаги шахсий транспорт воситасида озиқ-овқат бозорига олиб бориши мумкинлиги айтилди.

Шу билан бирга, ЙҲХБ ходимлари автотранспортни визуал кўздан кечириб, йўналиш ва аниқ манзил юзасидан тушинтиришлар сўрашга ҳақли эканлиги эслаб ўтилди.

Шунингдек, карантин қоидаларини бузган ҳайдовчиларнинг автотранспорт воситалари жарима майдонига қўйилаётгани қанчалик қонуний асосга эгалигига изоҳ берилди. Унга кўра, Вазирлар Маҳкамасининг 2020 йил 23 мартдаги 176-сон қарори билан республика Махсус комиссиянинг ўз ваколатлари доирасида қабул қилган қарорлари идоравий бўйсунуви ва ташкилий-ҳуқуқий шаклидан қатъи назар барча ташкилотлар ва уларнинг мансабдор шахслари, шунингдек, фуқаролар томонидан бажарилиши мажбурий деб белгиланиб қўйилган. Шундан келиб чиқиб, Махсус комиссия қарорлари қонуний кучга эга ҳисобланиши айтилди.Махсус комиссиянинг 4 апрелдаги 16-сонли баёнида карантин талабларининг ижросини сўзсиз таъминлаш ҳамда махсус рухсатномаси мавжуд бўлмаган ҳолда ҳаракатланаётган автотранспорт воситаларини ҳуқуқбузарлик давом эттирилишига йўл қўймаслик мақсадида, истисно тариқасида Ички ишлар органлари йўл-патрул хизмати ходимлари томонидан карантин даврида белгиланган тартибни бузганлиги учун, транспорт воситасини жарима майдончасига жойлаштириш йўли билан ушлаб турилиши билдирилди.

Эслатиб ўтамиз, карантин даврида муддати тугайдиган барча рухсат бериш хусусиятига эга ҳужжатлар муддати 1 июлгача узайтирилган.