Самарқанд вилоятида карантин қоидаларини бузиб, блокпостдан ниқобсиз қўшни вилоятга ўтмоқчи бўлган каттақўрғонликлар 10 суткадан қамалди, дея хабар беради «Дарё» мухбири.
Жорий йилнинг 10 апрель куни соат тахминан 18:30 атрофида Каттақўрғон тумани «Янгиобод» маҳалласида яшовчи Ж.О. ва А.С. карантин қоидаларига амал қилмасдан, жамиятда юриш-туриш қоидаларини қасддан менсимай Каттақўрғон туман ва Навоий вилояти Хатирчи туманини боғловчи блокпостда ниқобсиз ва қўшни вилоятга ўтмоқчи бўлиб, ИИБ ходимининг қонуний талабларига бўйсунмаган.
Аниқланган қоидабузарлик бўйича ҳуқуқни муҳофаза қилувчи орган ходимлари томонидан фуқаролар Ж.О. ва А.С.га нисбатан маъмурий баённомалар расмийлаштирилиб судга юборилган.
Каттақўрғон туман Маъмурий суди раиси С.Солиевнинг «Дарё»га маълум қилишича, карантин қоидаларини бузиб, ИИБ ходимига қаршилик кўрсатган ҳуқуқбузарлар Ж.О. ва А.С. Маъмурий жавобгарлик тўғрисидаги кодекснинг 54-моддаси (Эпидемияларга қарши кураш қоидаларини бузиш), 183-моддаси (Майда безорилик) ва 194-моддаси (Ички ишлар органлари ходимининг қонуний талабларини бажармаслик) билан айбли деб топилиб, 10 суткадан қамоқ жазоси тайинланган.
Изоҳ (0)