Карантин сабабли дала ишлари тўхтаб қолмагани, ғалла ва пахта масаласи аллақачон ҳал этилгани маълум қилинди

Қишлоқ хўжалиги вазири ўринбосари Саидкамол Хўжаев карантин даврида пахта ва ғалла етиштириш ишлари қай тарзда амалга оширилаётгани хусусидаги саволга аниқлик киритиб ўтди. Бу ҳақда «Дарё» мухбири хабар қилди.

Ахборот ва оммавий коммуникациялар агентлиги ҳузурида ташкил этилган штабда бўлиб ўтадиган брифингда вазир ўринбосари карантин даврида фермерликларнинг ишчилари уйда бўлган шароитда, дала ишлари тўхтаб қолмаганми, деган саволга жавоб берди.

«Ушбу икки экин тури майдонларимизга тўғри келадиган асосий экинлардан саналади. Ғаллани оладиган бўлсак, озиқ-овқат хавфсизлиги масаласи, пахта эса саноат корхоналаримизнинг асосий хом ашёси, ушбу икки йўналиш стратегик аҳамиятга эга саналади. Ишлар тўхтаб қолмаган», — дея таъкидлади вазири ўринбосари.

Жорий йил ҳосили учун республика бўйича 1 миллион 100 минг гектар суғориладиган майдонларга кузги бошоқли дон экинлари экилиб парваришланмоқда ҳамда ушбу майдонлардан 7 миллион 600 минг тонна дон етиштириш режалаштирилган. Ғалла майдонларининг 216 минг гектари (20%) бошоқлаш, 862 минг гектари (80%) найчалаш фазасида ривожланаётганлиги айтилди. Ғаллалар ривожланиб, пишишга яқин қолгани қўшимча қилинди. Бугунги кунда ғалла бўйича «Зарбдор 30 кунлик» эълон қилинган бўлиб, муҳим тадбирлар белгиланган. Мана шу 30 кунлик муддат ҳосилнинг қанчалик кўп бўлишини аниқлайдиган муддат сифатида қаралмоқда. Фермерлар томонидан ҳосилни 20 центнергача ошириб олиш чоралари кўрилади.

Пахта масаласида эса, бугунги кунга келиб 70% майдонга чигит экилгани маълум қилинди. Аввалроқ экилган чигит майдонларида кўчатлар бўй кўрсатаётгани, молия, кредит масалалари ҳукумат даражасида ҳал қилиб бўлингани билдирилди.

Қишлоқ хўжалиги ишларида барча механизаторлар ва ишчилар карантин тартибларига риоя қилган ҳолда жалб қилинган ва ишлар график асосида ташкил этилгани айтилди.

Эслатиб ўтамиз, аввалроқ озиқ-овқат хавфсизлигини таъминлаш чоралари доирасида прокурор секторларида ғалла парвариши, чигит экилиши, шунингдек, аҳоли томорқаларида экинлар тўлиқ экилишини таъминлаш чоралари кўрилиши маълум қилинган эди.