Ўзини «блогер» сифатида таништириб, ИИБ ходимлари фаолиятига халал берган самарқандлик тадбиркор 15 суткага қамалди. Бу ҳақда «Дарё» мухбири Фарҳод Норбўтаев хабар бермоқда.
Маълум бўлишича, 2020 йилнинг 15 апрель куни соат тахминан 10:00 да Самарқанд шаҳрининг Мирзо Улуғбек ва Маҳмуд Қошғарий кўчалари кесишмасида хизмат олиб бораётган вилоят ИИБ ЙҲХБ ходимлари ҳамда соҳавий хизмат вакиллари Nexia автомашинасини тўхтатади. ЙПХ ходимлари ҳайдовчидан ҳужжат сўраганда, ҳайдовчининг ёнида ўтирган йўловчи ўзини «блогер»ман деб таништириб, ЙПХ ходимларини тасвирга ола бошлайди. Ва иш фаолиятига халал беради.
ЙПХ ходимлари огоҳлантиришига қарамасдан фуқаро халал беришда давом этади ва ИИБ ходимларига «ҳали керакли жойда жавоб берасанлар, мен сенлар билан судда гаплашаман» дея уларга қўполлик қилади.
Карантин қоидаларини бузган ҳайдовчига нисбатан маъмурий баённома расмийлаштирилиб, автомашина жарима майдончасига жойлаштирилган.
Ходимлар фаолиятига халал бериб, давлат хизматчиларини тасвирга олган ва ҳақорат қилган тадбиркорга нисбатан барча ҳужжатлар тўпланиб, Самарқанд шаҳар маъмурий судига жўнатилган.
Самарқанд шаҳар маъмурий суди фуқарони Маъмурий жавобгарлик тўғрисидаги кодексининг 194-моддаси 1-қисми (Ички ишлар органлари ходимининг қонуний талабларини бажармаслик) ва 195-моддаси (Ички ишлар органлари ходимларининг ўз хизмат бурчларини бажаришларига қаршилик кўрсатиш) билан айбли деб топиб, унга 15 сутка маъмурий қамоқ жазоси тайинлаган.
Изоҳ (0)