Самарқандда карантин сабаб ҳот-дог тайёрлаб бермаган 63 ёшли фуқарони калтаклаган шахс қамоққа олинди. Бу ҳақда «Дарё» мухбири Фарҳод Норбўтаев хабар бермоқда.
Ҳод-дог тайёрлаб бермагани учун калтакланган бозор қоровули Ҳусанали Муродов «Дарё»га шикоят қилиб, ИИБ уни калтаклаган фуқарога нисбатан чора кўрмаётганини билдирганди.
«Дарё» суриштируви давомида эса кекса отахонни калтаклаган фуқаро 32 ёшли А.Т. эканлиги ва муштумзўр 2 ой илгари ҳам қилмиши учун қамалиб чиққани маълум бўлганди.
ИИВ ҳузуридаги Тергов департаменти ушбу ҳолат юзасидан расмий маълумот берди.
Аниқланишича, 2020 йилнинг 29 март куни тахминан соат 02:30 да 32 ёшли А.Т. Самарқанд шаҳрида жойлашган «Табиат-саховат» деҳқон бозори олдида жойлашган дўкон олдига келиб, шу дўконда норасмий қоровул бўлиб ишлаган фуқаро, 63 ёшли Ҳусанали Муродовга қорни очганлигини ва унга ҳот-дог тайёрлаб беришини сўраган.
Аммо Ҳусанали Муродов карантин сабабли дўкон ёпиқлигини айтганидан сўнг у билан жанжаллашиб қолиб, А.Т. отахонни қасддан уриб-дўппослаб, унга оғир тан жароҳати етказган.
Мазкур ҳолат юзасидан Самарқанд шаҳар ИИО ФМБ ҳузуридаги тергов бўлими томонидан фуқаро А.Т.га нисбатан Жиноят кодексининг 104-моддаси 1-қисми (қасддан баданга оғир шикаст етказиш) билан жиноят иши қўзғатилган ва А.Т.га Жиноят кодексининг 104-моддаси 2-қисми «в» банди (ўта шафқатсизлик билан, қасддан баданга оғир шикаст етказиш) билан айб эълон қилиниб, унга нисбатан қамоққа олиш тарзидаги эҳтиёт чораси қўлланилган.
Ҳозирда дастлабки тергов ҳаракатлари давом эттирилмоқда.
Изоҳ (0)