Ғузор туманининг янги тайинланган ҳокими Бекзод Суюнов биринчи маошини моддий ёрдамга муҳтож оилаларга хайрия қилди. Бу ҳақда «Дарё»га туман ҳокимлиги ахборот хизмати раҳбари Худойберди Йўлдошев маълум қилмоқда.
Таъкидланишича, халқ депутатлари Ғузор туман кенгашининг навбатдаги сессиясида туман ҳокими Бекзод Суюнов биринчи ойлик-маошини маҳалла ва оилани қўллаб-қувватлаш бўлими қошида ташкил этилган хайрия фондига ўтказиб беришини маълум қилган.
Қайд этилишича, хайрия фонди маблағлари моддий ёрдамга муҳтож оилаларга озиқ-овқат маҳсулотлари етказиб бериш билан шуғулланади.
Қашқадарё ҳокими Зоир Мирзаев блогер Хушнудбек Худойбердиев билан бўлган суҳбатида вилоят ҳокими рағбатлантирувчи маблағлар билан бирга 10 миллион сўмгача маош олишини таъкидлаганди. Туман ҳокимлари қанча маош олиши эса шу кунгача жамоатчиликка маълум бўлмаган.
Эслатиб ўтамиз, Ғузор ҳокими вазифасига киришган Бекзод Суюнов 2018 йилнинг август ойидан туман прокурори лавозимида ишлаб келган. Собиқ ҳоким Саъдулла Бобоқулов соғлиғи туфайли ишдан кетгач, Бекзод Суюнов ҳоким вазифасини бажаришга киришди. Туманга ҳозирча прокурор тайинланмаган.
Изоҳ (0)