Коронавирусдан вафот этган 59 ёшли фарғоналик аёлнинг вирус юқтирган икки ойлик набираси соғайди. Бу ҳақда «Дарё» мухбири Азизжон Эрматов хабар берди.
Маълум бўлишича, Фарғона вилояти юқумли касалликлар шифохонасида даволанган икки ойлик чақалоқ тузалган бўлса-да, шифохонада қолмоқда. Боиси, чақалоқнинг онасининг муолажалари давом этмоқда.
«Бугунги кунгача Фарғона вилоятида 78 кишида коронавирус инфекцияси аниқланган. Самарали даволаш муолажаларидан кейин беморларнинг икки нафари тўлиқ тузалиб, реабилитацияга олинган. Бир бемор вафот этган. Айни пайтда вилоят юқумли касалликлар шифохонасида 75 нафар бемор даволанмоқда. Тажрибали шифокорларимиз беморларнинг тезроқ соғайиши учун астойдил курашяпти. Бунинг учун шифохонамиз зарур дори-дармонлар, замонавий тиббий технологиялар, ҳимоя воситалари билан таъминланган», — дейди вилоят соғлиқни сақлаш бошқармаси бошлиғи Одилжон Умаров.
Таъкидлаш жоиз, Умра сафаридан қайтган ёзёвонлик 59 ёшли аёлда коронавирус инфекцияси аниқлангач, унинг турмуш ўртоғи, икки фарзанди ва келини ҳам вирус юқтиргани маълум бўлганди.
Эслатиб ўтамиз, Умра сафарида бўлиб қайтган ёзёвонлик аёл 11 апрель куни вафот этди. 13 апрель куни эса вилоятда коронавирус инфекциясига чалинган беморларнинг икки нафари бутунлай соғайиб, реабилитацияга кузатилган.
Изоҳ (0)