Ўзбекистон Бош прокуратураси коронавирус пандемияси сабабли мамлакатда юзага келган вазият ҳамда прокуратура идораларининг пандемияга қарши кураш борасидаги вазифалари юзасидан аҳолига мурожаат қилди.
Қайд этилишича, Бош прокуратура тегишли ваколат ҳамда мажбуриятлар доирасида глобал инқироз ва пандемия шароитида прокуратура органлари томонидан амалга оширилиши шарт бўлган қўшимча вазифаларни белгилаб олди.
Жумладан, бугунги мураккаб вазиятда прокуратура органлари томонидан қуйидаги вазифалар ижросига устувор аҳамият қаратилади.
Биринчидан, карантин муносабати билан жорий этилган чекловларда оғир вазиятга тушиб қолган оилалар, шунингдек, вақтинчалик даромад манбаини йўқотган фуқароларни ижтимоий қўллаб-қувватлаш чоралари прокуратура идоралари томонидан алоҳида назоратга олинади.
Прокурор секторларида ана шундай вазиятдаги 5 мингта оилага карантин даврида бевосита прокуратура органлари томонидан белгиланган миқдорларда моддий ёрдам кўрсатилади.
Иккинчидан, иш ҳақи, пенсия ва нафақа тўловларининг тўлиқлиги ва узлуксизлиги устидан қатъий назорат олиб борилади. Бу жараёнда ижтимоий адолат ва қонунийликни таъминлашнинг барча зарур чоралари кўрилади.
Учинчидан, карантин даврида аҳолини асосий турдаги озиқ-овқат маҳсулотлари, дори-дармон ва тиббий буюмлар билан узлуксиз таъминлаш, нарх-навони барқарор сақлаш чоралари кўрилади.
«Даладан дастурхонга» тамойили асосида қишлоқ хўжалиги ва бошқа маҳсулотлар ишлаб чиқарувчилардан бевосита истеъмолчиларга, асосийси, маҳаллаларда кўчма савдони ташкил этиш орқали фуқароларга энг яқин ва қулай ҳудудларга етказиб берилади.
Тўртинчидан, коронавирус пандемиясининг иқтисодиётга таъсирини юмшатиш борасидаги чора-тадбирлар доирасида тадбиркорларни қўллаб-қувватлаш, карантин чекловлари, санитария ва гигиена талабларига риоя этган ҳолда уларнинг фаолияти тўхтаб қолишига йўл қўймасликнинг барча зарур чоралари кўрилади. Тадбиркорларга солиқ тўловлари, банк кредитлари ҳамда коммунал тўловлар бўйича берилган имтиёзларнинг тўлиқ қўлланилиши устидан назорат олиб борилади.
Экспортёрларни қўллаб-қувватлаш, экспорт прогнози бажарилишини таъминлаш бўйича тизимли ишлар амалга оширилади. Бунда 3379 нафар экспортчининг ҳар бирига прокуратура ходимлари бириктирилиб, юзага келаётган муаммолар биргаликда ҳал этилади ва уларга зарур амалий ёрдам кўрсатилади. Мазкур амалиёт 30 нафардан ортиқ иш ўрнига эга, йирик озиқ-овқат ишлаб чиқарувчилари билан ҳам йўлга қўйилади.
Юк ташишда турли тўсиқ ва муаммолар вужудга келишининг олдини олиш юзасидан зарур чоралар кўриб борилади. Мавжуд 516 та карантин постига бириктирилган прокуратура ходимлари бу борада алоҳида иш олиб боради.
Давлат ҳамда ҳудудий инвестиция дастурлари ижроси устидан назорат янада кучайтирилади. Бюджет тушуми ижросини таъминлаш ва янги тушум манбаларини аниқлашга фаол кўмаклашилади.
Бешинчидан, озиқ-овқат хавфсизлигини таъминлаш чоралари доирасида прокурор секторларида ғалла парвариши, чигит экилиши, шунингдек, аҳоли томорқаларида экинлар тўлиқ экилишини таъминлаш чоралари кўрилади.
Олтинчидан, карантин чекловлари даврида ҳуқуқбузарликлар профилактикаси ва жиноятчиликка қарши курашиш ишлари бир зум ҳам тўхтатилмайди. Бунда фуқароларнинг карантин қоидаларига сўзсиз риоя этишини таъминлаш, шунингдек, коронавирус пандемияси ҳақида асоссиз хабарлар тарқатиш, аҳоли орасида саросима ва ваҳима келтириб чиқаришга уринишларнинг олдини олишга алоҳида эътибор қаратилади.
Еттинчидан, коронавирус инфекциясига чалинган беморлар билан мулоқотда бўлган фуқароларни аниқлаш ва уларнинг саломатлигини назоратга олишда прокуратура терговчилари санитария-эпидемиология назорати хизматларига яқиндан кўмаклашиб боради.
Бош прокуратура ўз мурожаатида коронавирус тарқалишининг олдини олиш ҳамда унинг устидан ғалаба қозониш учун аҳолидан ҳушёрлик ва огоҳликни кучайтиришни, карантин билан боғлиқ жорий этилган барча тартиб-қоидаларга сўзсиз ва қатъий амал қилишни сўраган.
Аввалроқ Бош прокуратура фуқаролардан коронавирус тарқалишининг олдини олиш мақсадида кундалик юритишни сўраган эди. Шунингдек, Бош прокуратура ходимлари икки марта ўз маошларининг бир қисмини коронавирус инфекциясига қарши курашга хайрия қилганди.
Изоҳ (0)