Тошкент шаҳрида 14 апрель, сешанба куни, Нурафшон ва Чиғатой кўчалари кесишмасида тез тиббий ёрдам машинаси йўл-транспорт ҳодисасига учрагани ҳақида хабар берилган эди. Ички ишлар вазирлиги Йўл ҳаракати хавфсизлиги бош бошқармаси мазкур ЙТҲ бўйича маълумот берди.
Дастлабки маълумотларга кўра, 2020 йилнинг 14 апрель куни соат 12:40 атрофида Тошкент шаҳар Олмазор тумани Нурафшон ва Чиғатой кўчалари кесишмасида чақирув бўйича маёқчалари ёқилган ҳолатда ҳаракатланаётган Ford русумли тез ёрдам машинаси ЙТҲга учраган.
Маълум қилинишича, ҳайдовчи Г.И. бошқарувидаги тез ёрдам машинаси чақирув бўйича маёқчалари ёқилган ҳолатда светофорнинг қизил чироғида чорраҳага чиқиб келган вақтида яшил чироқда кесишмадан ҳаракатланиб ўтаётган ҳайдовчи Н.С. бошқарувидаги Epica русумли машина билан тўқнашган.
Натижада Epica ҳайдовчиси ва йўловчиси, тез тиббий ёрдам машинаси ҳайдовчиси ва икки нафар йўловчиси тан жароҳати билан шифохонага олиб кетилган. Мазкур тўқнашув юзасидан ҳозирги вақтда суриштирув ишлари олиб борилмоқда.
Изоҳ (0)