Соғлиқни сақлаш вазирлиги тез ёрдам машинаси ҳамда Epica тўқнашуви оқибатида рўй берган йўл-транспорт ҳодисаси юзасидан қўшимча маълумот берди.
«14 апрель куни соат 12:38 Олмазор тумани Чиғатой Дарвоза чорраҳасида чақирув бўйича кетаётган Ford русумли тез ёрдам машинаси ҳамда Chevrolet Epica русумидаги автомашина иштирокида йўл-транспорт ҳодисаси юз берган. Оқибатда 5 киши жароҳатланган. Улар зудлик билан тиббий текширувдан ўтказилиб, белгиланган тартибда тез тиббий ёрдам кўрсатилгач, Республика шошилинч тез тиббий ёрдам илмий марказига олиб келинган. Жароҳатланганлардан бири кўчма бригада шифокори, 32 ёшли У.У.нинг аҳволи қониқарли бўлганлиги сабабли уйига жавоб берилган.
Тезкор бригада фелдшери, 20 ёшли О.О., тез ёрдам автомашинаси ҳайдовчиси, 55 ёшли И.Г. ҳамда Chevrolet Epica ҳайдовчиси ва йўловчиси: 46 ёшли Н.С. ва 20 ёшли М.А. эса марказнинг нейрожарроҳлик бўлимига ётқизилган. Айни пайтда уларнинг аҳволи ўртача оғирликда.
Беморларга малакали шифокорлар томонидан стандартлар асосида тиббий ёрдам кўрсатилмоқда. Ҳозирда йўл-транспорт ҳодисаси юзасидан суриштирув ишлари олиб борилмоқда», дейилади ССВ жамоатчилик билан алоқалар бўлими берган маълумотда.
Аввал Тошкентда ЙТҲга учраган Ford русумидаги тез ёрдам машинасига жиддий зарар етгани ва у чорраҳада чап томонга ағдарилгани, Ford’нинг чақирув бўйича маёқчалари ёқилган ҳолатда светофорнинг қизил чироғида чорраҳага чиқиб келган вақтида Epica билан тўқнашуви оқибатида 5 киши жароҳат олгани хабар қилинганди.
Изоҳ (0)