Таиландда COVID-19 коронавирус инфекциясининг ўлжаларидан бири суд-тиббий экспертиза ходими бўлди, у касалланганларнинг танасини ёрган вақтида инфекцияни юқтириб олган бўлиши мумкин, деб ёзмоқда BuzzFeed News.
Муаллифларнинг қайд этишича, Бангкокда ишловчи суд-тиббиёт экспертизаси ходимининг касалланиши COVID-19 инфекциясини ўлган одамдан юқтириб олиш бўйича биринчи ҳолатга айланди.
Мутахассисларнинг тахминича, бемор коронавирусни иш жойида эмас, хориждан келган одамлар билан мулоқотда юқтирган бўлиши ҳам мумкин. Сабаби у вафот этган пайтда, яъни 20 март кунигача Таиландда касаллик юқтириб олганлар, асосан, чет эл давлатларидан келган фуқаролар бўлган.
Мавзуга доир: Коронавирусдан вафот этган киши қандай дафн этилади? Ўзбекистон мусулмонлари идораси жавоб берди
«Мурдани ёриб кўриш ва бошқа операциялар суд-тиббиёт экспертларининг коронавирус юқтириб олиш хавфини оширади», — дея вазиятга изоҳ берган Нью-Ҳейвен университети олими Саммер Макги.
Евопа касалликлар профилактикаси ва назорати маркази (ECDC) ҳисоботида ҳам COVID-19’нинг одам мурдаси орқали тирик инсонга юқиши мумкинлиги, бироқ ушбу ҳолатнинг эҳтимоли паст экани маълум қилинганди. Ҳисоботда касалликдан вафот этган одамга яқинлашишга тўғри келганда, барча тиббий ҳимоя воситаларидан фойдаланиш лозимлиги қайд этилганди.
«SARS-CoV-2 вируси бир неча кун давомида турли буюмлар ва атроф-муҳитда яшай олиши сабаб унинг ўлган танада ҳам маълум вақт қолиши мумкинлигини тахмин қилиш мумкин», — дейилган ECDC ҳисоботида.
Изоҳ (0)