Италияда 14 апрель ҳолатига кўра коронавирус билан касалланганларнинг умумий сони 104 291 нафарга етди. Мамлакат фуқаро муҳофазаси департаментининг маълумотига кўра, бир сутка ичида 675 та янги ҳолат қайд этилган.
АNSА агентлигининг ёзишича, бу бир ой ичида касалланганлар сони бўйича энг паст кўрсаткич. 6 март куни Италияда бир сутка ичида вирус билан касалланиш бўйича 620 та янги ҳолат кузатилганди. 13 мартда эса бир сутка ичида COVID-19 юқтириб олганлар сони минг кишидан ошган.
14 апрелдаги маълумотга кўра, мамлакатда тузалганлар билан қўшиб ҳисоблаганда вирус юқтириб олганларнинг умумий сони 162 488 нафарга етган.
Касалликдан вафот этганларнинг сони эса 20 минг нафардан ошиб кетган. Италияда бир сутка ичида 566 нафар инсон коронавирус оқибатида дунёдан кўз юмган. Бу борадаги энг паст натижа 12 апрелда кузатилган бўлиб, шу куни бир сутка ичида 431 нафар киши вафот этганди. Мамлакат соғлиқни сақлаш вазирлиги маълумоти бўйича, 21 067 нафар инсон COVID-19 оқибатида вафот этган, 37 130 киши эса касалликдан тузалган.Жонс Ҳопкинс университети маълумотларига кўра, Италия бутун дунёда коронавирус билан касалланганлар сони бўйича 3-ўринни эгаллаб турибди. Бу борада қўшни мамлакат Испания Европада етакчи (172 541 минг нафар одам коронавирус билан касалланган, 18 056 киши вафот этган), дунёда COVID-19’ни юқтириб олганлар сони бўйича АҚШ етакчилик қилмоқда. У ерда 584 073 нафар киши COVID-19 билан касалланган, вафот этганлар сони эса 24,4 минг нафаргача етган.
Изоҳ (0)