Tailandda COVID-19 koronavirus infeksiyasining o‘ljalaridan biri sud-tibbiy ekspertiza xodimi bo‘ldi, u kasallanganlarning tanasini yorgan vaqtida infeksiyani yuqtirib olgan bo‘lishi mumkin, deb yozmoqda BuzzFeed News.
Mualliflarning qayd etishicha, Bangkokda ishlovchi sud-tibbiyot ekspertizasi xodimining kasallanishi COVID-19 infeksiyasini o‘lgan odamdan yuqtirib olish bo‘yicha birinchi holatga aylandi.
Mutaxassislarning taxminicha, bemor koronavirusni ish joyida emas, xorijdan kelgan odamlar bilan muloqotda yuqtirgan bo‘lishi ham mumkin. Sababi u vafot etgan paytda, ya’ni 20-mart kunigacha Tailandda kasallik yuqtirib olganlar, asosan, chet el davlatlaridan kelgan fuqarolar bo‘lgan.
Mavzuga doir: Koronavirusdan vafot etgan kishi qanday dafn etiladi? O‘zbekiston musulmonlari idorasi javob berdi
“Murdani yorib ko‘rish va boshqa operatsiyalar sud-tibbiyot ekspertlarining koronavirus yuqtirib olish xavfini oshiradi”, — deya vaziyatga izoh bergan Nyu-Heyven universiteti olimi Sammer Makgi.
Yevopa kasalliklar profilaktikasi va nazorati markazi (ECDC) hisobotida ham COVID-19’ning odam murdasi orqali tirik insonga yuqishi mumkinligi, biroq ushbu holatning ehtimoli past ekani ma’lum qilingandi. Hisobotda kasallikdan vafot etgan odamga yaqinlashishga to‘g‘ri kelganda, barcha tibbiy himoya vositalaridan foydalanish lozimligi qayd etilgandi.
“SARS-CoV-2 virusi bir necha kun davomida turli buyumlar va atrof-muhitda yashay olishi sabab uning o‘lgan tanada ham ma’lum vaqt qolishi mumkinligini taxmin qilish mumkin”, — deyilgan ECDC hisobotida.
Izoh (0)