Давлат солиқ қўмитаси ва Марказий банк бошқарувининг «Ўзбекистон Республикаси Марказий банки ва тижорат банклари томонидан банк ҳисобварақларига оид ахборотларни Давлат солиқ қўмитасига электрон узатиш тартиби тўғрисидаги низомни тасдиқлаш ҳақида»ги қўшма қарори лойиҳаси турли мулоҳазаларга сабаб бўлганди.
Ҳужжат лойиҳасига кўра, Давлат солиқ қўмитасининг сўровига биноан, бир ой давомида жисмоний шахсларнинг барча банк карталарига келиб тушган пул маблағлари айланмаси 30 миллион сўмдан (шу жумладан, чет эл валютаси миллий валюта эквивалентида бўлган тақдирда) ва транзакциялар сони 10 тадан ошган P2P операциялари (жисмоний шахсларнинг картасидан картасига) тўғрисидаги ахборотлар 3 иш кунида миллий ҳамда чет эл валютасида тақдим этилиши талаб қилинаётганди.
Мазкур қарор юзасидан Ўзбекистон Сенати, Савдо-Саноат палатаси, Uzcard тўлов тизими ўз муносабатини билдирган. Мазкур ташкилотлар муносабатларида лойиҳанинг Солиқ кодексига ва «Банк сири тўғрисида» қонунга мувофиқ эмаслиги, унинг яширин иқтисодиёт улуши ошиб кетишига сабаб бўлиши таъкидланган.
Муҳокамаларда билдирилган танқидлар ва муносабатларга жавобан, Давлат солиқ қўмитаси ва қўмита раиси ўринбосари Абдулла Азизов мазкур лойиҳа бўйича изоҳ бериб, ундан кўзланаётган мақсадни тушунтирганди ҳамда қарор лойиҳаси қайта кўриб чиқилишини маълум қилганди.
Сенат томонидан маълум қилинишича, Давлат солиқ қўмитаси Сенатнинг мазкур қарор лойиҳаси бўйича билдирган муносабатига жавоб берган.
Таъкидланишича, Давлат солиқ қўмитасининг раис ўринбосари имзоси билан 13 апрель куни Сенатга хат йўлланган. Хатда айтилишича, махсус комиссиянинг қарорига мувофиқ, ҳужжат лойиҳасини ишлаб чиқиш бўйича топшириқларнинг ижро муддати икки ойга узайтирилган. Шунингдек, таклифлар ҳамда эътирозлар инобатга олиниб, қарор ва у билан тасдиқланадиган низом лойиҳаси «regulation.gov.uz» сайтидаги муҳокамадан қайтариб олинган.
Ҳужжат лойиҳасининг муҳокамаси 2020 йил 21 апрелга қадар давом этиши режалаштирилган эди.
Изоҳ (0)