Тошкент шаҳрида коронавирусга чалинган беморлар даволанаётган Эпидемиология, микробиология ва юқумли касалликлар институти клиникасининг 67 нафар ходими 15 апрель, чоршанба куни, соғлиқни сақлаш вазири Алишер Шодмонов бошчилигида масъуллар томонидан реабилитацияга кузатилди. Уларнинг ўрнида тиббиёт ходимларининг навбатдаги гуруҳи фаолият бошлади. Бу ҳақда Соғлиқни сақлаш вазирлиги хабар берди.
Қайд этилишича, ушбу клиника жамоасининг халқаро стандартлар асосида даво муолажаларини олиб борганлиги учун 14 апрель куни 10 нафар коронавирус инфекциясига чалинган бемор бутунлай соғайишга эришди. Айни пайтда мазкур шифохонада 100 нафардан ортиқ бемор даволанмоқда.
Соғлиқни сақлаш вазири Алишер Шодмонов бор маҳорати ва тажрибасини ишга солган ҳолда меҳнат қилиган тиббиёт ходимларига чуқур эҳтиром кўрсатган ҳолда уларнинг ўрнида фаолият бошлаган шифокорларга муваффақият тилади, дейилади вазирлик хабарида.
Аввалроқ Эпидемиология, микробиология ва юқумли касалликлар илмий-текшириш институти клиникасида коронавирус инфекциясига чалинган 10 нафар бемор буткул соғайиб, 14 апрель куни Республика ихтисослаштирилган терапия ва тиббий реабилитация илмий-амалий тиббиёт марказига кузатилгани ҳақида хабар берилганди.
Эслатиб ўтамиз, Тошкентдаги Вирусология илмий-текшириш институти клиникасида коронавирус инфекциясига қарши курашган тиббиёт ходимлари 28 март ҳамда 12 апрель кунлари ўрин алмашган эди.
Ўзбекистонда коронавирусга қарши курашда иштирок этадиган шифокорлар ва бошқа ходимларнинг ҳар 14 кунлик фаолият даври учун Президент томонидан махсус қўшимча рағбатлантириш тўлови белгиланган. Унга кўра, врач-ходимларга, врач-лаборантларга — 25 миллион сўм; ўрта тиббиёт ходимларига, ҳамшира-лаборантларга — 15 миллион сўм; кичик тиббиёт ходимларига — 10 миллион сўм; бошқа ходимларга — 5 миллион сўм. Шунингдек, беморлар билан ишлаш давомида коронавирус инфекциясини юқтириб олган тиббиёт, санитария-эпидемиология хизмати ва бошқа ходимларга 100 миллион сўмдан тўланади.
Шунингдек, коронавирус инфекциясига қарши курашиш доирасида беморлар билан ишлаган вақтида коронавирус инфекциясини юқтириш натижасида оғир аҳволга тушган ва соғлиғи тикланмаган тақдирда тиббиёт, санитария-эпидемиология хизмати ва бошқа ходимларга ёки уларнинг оила аъзоларига эса 250 миллион сўм миқдорида бир марталик тўловлар тўланади.
Изоҳ (0)