13-martga o‘tar kechasi G‘ijduvon tumanida 22 yoshli fuqaro o‘zining sherigi bilan oldindan jinoiy til biriktirib “Bo‘lakiyon” mahallasida yashovchi fuqaroning avtomobillarini yoqib yubordi. Bu haqda IIV huzuridagi Tergov departamenti xabar berdi.
Ma’lum bo‘lishicha, 22 yoshli I.J.ni “Bo‘lakiyon” mahallasida yashovchi 61 yoshli G‘.T. bilan oldindan kir yuvish kukuni savdosi masalasida o‘zaro kelishmovchiligi bo‘lgan. Shu sabab u 21 yoshli tanishi bilan G‘.T.ning hovlisi oldida turgan Captiva va Ford Tranzit rusumli avtomashinalari ustiga benzin sepib, o‘t qo‘yib yuborgan. Yigitlar jabrlanuvchiga ko‘p miqdorda moddiy zarar yetkazib, hodisa sodir bo‘lgan joydan yashiringan.
Holat yuzasidan G‘ijduvon tuman IIO FMB huzuridagi tergov bo‘limi tomonidan J.I. va J.Z.ga nisbatan Jinoyat kodeksining 173-moddasi (Mulkni qasddan nobud qilish yoki unga zarar yetkazish) 2-qismi “b, v” bandlari bilan jinoyat ishi qo‘zg‘atilgan. Hozirda tergov harakatlari olib borilmoqda.
Izoh (0)