Тожикистоннинг Бoxтар шаҳрида хориждан келган тожикистонликлар карантинда сақланаётган маҳаллий клиник шифохоналардан бирининг ходимаси вафот этди. Тожикистон Соғлиқни сақлаш ва ижтимоий ҳимоя вазирлигининг маълум қилишича, аёл 12 апрель куни вафот этган.
Вазирлик 58 ёшли Оишахон Алимованинг ўлимига инфильтратив сил ва юрак-қон томир тизими касалликлари сабаб бўлганини айтмоқда. Алимова ким бўлиб ишлаганига аниқлик киритилмаган.
«Fergana.ru» нашрининг ёзишича, Алимова вилоят касалхонасида фаррош бўлиб ишлаган ва қўшимча ҳақ эвазига карантин зонасида ҳам ишлашга рози бўлган. Марҳуманинг қариндошлари таъкидлашича, Оишахоннинг юраги оғриб турган ва у қалқонсимон безини даволатган, бироқ бошқа касалликдан азият чекмаган.
Мамлакат Соғлиқни сақлаш вазирлиги фуқароларни Тожикистон ҳудудида коронавирус инфекцияси тарқалгани тўғрисидаги миш-мишларга ишонмасликка чақирмоқда.
Аввалроқ Суғд вилоятида ҳам икки бемор вафот этгани ҳақида хабарлар берилган. Улардан бири — 61 ёшли Ҳабибулло Шодиев 1 апрель куни пневмониядан, иккинчиси — Ҳожимуҳаммад Тошев 11 апрель куни юрак ишемик касаллиги ва гипертониядан вафот этган. Бироқ шифокорлар беморда пневмония бўлганини ҳам айтган. Маълум бўлишича, Тошев Шодиевнинг укаси билан алоқада бўлган. Ушбу ҳолат тожикистонликлар орасида ваҳима келтириб чиқарган, аммо соғлиқни сақлаш вазири ҳамон мамлакатда COVID-19 йўқлигини таъкидламоқда.
Мавзуга доир: Тожикистон коронавирус хавфи сабабли хорижликларнинг мамлакатга кириш-чиқишини вақтинчалик тақиқлади
Эслатиб ўтамиз, Ўзбекистон 9 апрель куни Тожикистонга ун ва антисептиклардан иборат 18 вагон гуманитар ёрдам юборган эди.
Изоҳ (0)