Жаҳон соғлиқни сақлаш ташкилоти раҳбари Тедрос Адан Гебрейесус коронавирус туфайли жорий этилган чекловларни олиб ташлаш бўйича тавсиялар берди, деб хабар бермоқда «РБК».
Унинг сўзларига кўра, давлатлар чекловларни олиб ташлашдан олдин бир қатор чораларга амал қилинганига ишонч ҳосил қилиши керак. Хусусан, ҳукумат вируснинг одамдан одамга юқишини, касалланиш бўйича вазиятни назорат қила олиши лозим. Соғлиқни сақлаш тизими ҳар бир COVID-19 ҳолатини аниқлаш, текшириш, изоляция қилиш ва даволаш имкониятига эга бўлиши керак.
Бундан ташқари, ЖССТ раҳбари тиббий муассасаларда коронавирус тарқалиш хавфини минималлаштириш, шунингдек, ишхоналар, мактаблар каби одамлар ташриф буюриши керак бўлган бошқа жамоат жойларида профилактика чораларини кўриш зарурлигини таъкидлаган. Шунингдек, коронавируснинг четдан юқиши хавфини олдини олиш ҳам лозим.
ЖССТ раҳбарининг айтишича, 2019 йилда пандемияни юзага келтирган COVID-19 гриппдан 10 баравар хавфлироқ. «Вирус жуда тез тарқаляпти. Шу сабабли чеклов чораларини аста-секин олиб ташлаш керак ва бу жараённи назорат қилиш керак. Бу биттада амалга оширилмаслиги лозим», — деб огоҳлантирган Гебрейесус.
Хабарда айтилишича, 10 апрель куни ЖССТ раҳбари айрим давлатлар чекловларни олиб ташлашни режалаштираётганини маълум қилган ва агар бу жуда тез содир бўлса, бу ўлим ҳолатлари хавфининг қайта тикланишига олиб келиши мумкинлигидан огоҳлантирган.
Жонс Ҳопкинс маълумотларига кўра, айни пайтда дунё бўйича коронавирусга чалинганлар сони 1 миллион 920 минг кишидан, вафот этганлар сони 119 минг кишидан ошди. Ўзбекистонда эса коронавирусга чалинганлар сони 1054 кишини ташкил қилмоқда.
Изоҳ (0)