Ички ишлар вазирлиги Йўл ҳаракати хавфсизлиги бош бошқарма бошлиғи ўринбосари Эрали Бозоров АОКА қошидаги штабда ташкил қилинган брифингда фуқаролардан келиб тушган саволларга жавоб қайтарди ва ҳукуматнинг коронавирусга қарши махсус комиссияси қарорларида автотураргоҳ учун кунлик тўловни бекор қилиш белгиланмаганлигини маълум қилди.
«Республика махсус комиссиясининг 2020 йил 23 мартдаги йиғилиш баёни асосида 24 мартдан бошлаб транспорт воситаларининг ҳаракатланиши чекланган, карантин талабларни бузаётган автотранспорт воситаларининг ҳуқуқбузарликни давом эттиришининг олдини олиш мақсадида ушбу автотранспорт воситалари жарима майдонига жойлаштирилади.
Бугунги кунга қадар карантин қоидаларини бузиб ҳаракатланган 5884 та автотранспорт воситаси аниқланиб, уларнинг 3930 таси вақтинча жарима майдонига қўйилган. Ҳайдовчиларга нисбатан карантин қоидасини бузганлик бўйича маъмурий баённомалар Санитария-эпидемиология назорати ходимлари томонидан тузилади. Махсус комиссиянинг 16-сонли баёни талабларига кўра, маъмурий ҳуқуқбузарлик тўғрисидаги қарор белгиланган тартибда ижро этилганидан ёки ижроси тугатилгандан сўнг автотранспорт воситаси жарима майдончасидан чиқарилади. Яъни белгиланган жарима ҳайдовчи томонидан тўланганидан сўнг санитария-эпидемиологик осойишталик марказлари (СЕОМ) ходимлари жарима тўлангани тўғрисида маълумотнома беради. Ушбу маълумотнома асосида Давлат йўл ҳаракати хавфсизлиги хизмати ходими автомобилни жарима майдончасидан чиқариш учун рухсат беради ва автомобиль жарима майдончасидан чиқарилади», – автотранспорт воситасининг жарима майдонидан чиқарилиш тартибини тушунтирган Эрали Бозоров.
Шунингдек, брифингда жарима майдонига жойлаштирилган транспорт воситаларининг эгаларидан тураргоҳ учун кунлик тўлов ундирилиши борасидаги саволларга ҳам жавоб берилди. Эрали Бозоровнинг айтишича, маъмурий жарима тўланганидан кейин автоулов жарима майдонидан чиқарилади, бунда тураргоҳ учун ҳам тўловни амалга ошириш талаб этилади. Сабаби махсус комиссиянинг қарорларида автотураргоҳ учун кунлик тўловни бекор қилиш белгиланмаган.
Мавзуга доир: