Karantindagi Toshkent: yam-yashil Amir Temur xiyoboni, yangi postlar, huvullagan markaziy ko‘chalar — suratlarda

Avval xabar berganimizdek, 6-apreldan boshlab Respublika maxsus komissiyasi tomonidan qo‘shimcha chora-tadbirlar belgilandi.

Jumladan, “o‘zini yakkalash” hayot tarzi Nukus va Toshkent shaharlari hamda viloyatlar markazlarida majburiy ravishda joriy etildi.

Fuqarolarning yashash hududidagi savdo nuqtalarida birinchi galdagi hayotiy zarur bo‘lgan ehtiyojlari, shifokor ko‘rigiga murojaat etishdan boshqa maqsadlarda chiqishi qat’iyan cheklandi (ish joyiga borishi va kelishi bilan bog‘liq holatlar bundan mustasno). Harakatlanishda hamda savdo do‘konlari va boshqa joylarda ikki metrlik ijtimoiy masofani saqlash talab etildi. Ushbu talablarni buzgan shaxslar qonunchilikka muvofiq tegishli javobgarlikka tortilishi mumkinligi begilandi.

Shu bilan birga, Bosh prokuratura fuqarolardan kundalik yuritishni so‘radi. Har bir fuqaro qachon, kim bilan, qayerda va qay tarzda muloqot qilganini yozib borishi maqsadga muvofiq ekanligi ma’lum qilindi.

Shuningdek, Toshkent va Nukus shaharlari hamda viloyat markazlarida istisno holatlardan tashqari mototransport (skuter) hamda velosipedda harakatlanish karantin davrida vaqtincha cheklandi.

Ichki ishlar organlari yo‘l-patrul xizmati xodimlari tomonidan karantin davrida avtotransport vositasini maxsus ruxsatnomasiz boshqarganlik uchun transport vositasi jarima maydonchasiga joylashtirish yo‘li bilan ushlab turilishi xabar qilindi.

Toshkent shahar IIBB Yo‘l harakati xavfsizligi boshqarmasi va Toshkent shahar Davlat xizmatlari markazlari o‘zaro hamkorlikda o‘tkazgan nazorat-reyd tadbirlari natijasida 52 ta stiker bekor qilinib, avtomashinalar jarima maydoniga qo‘yildi.

Shuningdek, 6-apreldan boshlab Toshkent shahrining 11 ta tumanidagi 514 ta mahalla qoshida “Jamoatchilik nazorati maskani” tashkil etildi.

“Daryo” muxbiri yuqorida qayd etilgan yangi o‘zgarishlardan so‘ng Toshkentda qanday muhit hukm surayotganini kadrlarga muhrladi.

Eslatib o‘tamiz, O‘zbekistonda koronavirusga chalinganlar soni 504 kishiga yetgan. Bugungi kungacha 30 nafar bemor virusdan to‘liq sog‘aygani qayd etildi.

Bo‘m-bo‘sh Amir Temur xiyoboni hududi.

Mirobod va Yakkasaroy tumanlarini ajratib turuvchi post.