Адлия вазирлиги автомашинани стикерсиз бошқарганлик учун жаримани тўлаш бўйича одамларни қизиқтирган саволга жавоб берди

Адлия вазирлиги бошқарма бошлиғи Ғайбулло Примов АОКА қошида ташкил қилинган штабда ўтказилган брифингда автомашинани рухсатномасиз бошқарганлик учун 4 миллион 460 минг сўм жаримага тортилган ҳайдовчининг жаримани карантиндан кейин тўлашга рухсат этилган ёки этилмагани юзасидан йўллаган саволига жавоб қайтарди.

«Президентнинг 2020 йил 3 апрелдаги «Коронавирус пандемияси даврида аҳоли, иқтисодиёт тармоқлари ва тадбиркорлик субъектларини қўллаб-қувватлашга доир қўшимча чора-тадбирлар тўғрисида»ги ПФ–5978-сон фармонига кўра, карантинга олинган шахсларга нисбатан қўлланилган маъмурий жарималарни (карантин қоидаларини бузганлик учун жавобгарлик бундан мустасно) тўлаш муддатлари карантин муддати тугагунга қадар узайтирилиши белгиланган.

Шундан келиб чиқиб, сиз карантин қоидаларни бузганлигингиз учун сизга нисбатан қўлланилган маъмурий жарималарни тўлаш муддати узайтирилмайди.

Бундан ташқари, мазкур норма фақат карантинга олинган шахсларга нисбатан татбиқ этилади», – дея жавоб берди Примов.

Шунингдек, бирифинг давомидан «Хусусий клиниканинг бош врачиман, лекин бизда хизмат машиналаримиз йўқ, шахсий транспортда ҳаракатланса бўладими?», - дея йўлланган савол бўйича ҳам тушунтириш берилди.

«Республика махсус комиссиясининг 2020 йил 30 мартдаги қарори билан Автотранспорт воситалари ҳаракатланишига махсус рухсатнома расмийлаштиришнинг вақтинчалик тартибига кўра, ташкилий-ҳуқуқий шаклидан қатъи назар соғлиқни сақлаш тизимидаги ташкилотларнинг, тиббий-санитария ва эпидемиологик хизматлар кўрсатувчи ташкилотларнинг хизмат ва ходимларининг шахсий автотранспорт воситаларига рухсатномасиз ҳаракатланиши белгиланган эди.

Махсус комиссиянинг 2020 йил 8 апрелдаги қарори билан Автотранспорт воситалари ҳаракатланишига махсус рухсатномалар талаб этилмайдиган ҳолатлар рўйхатига ўзгартиришлар киритилди.

Унга кўра, ташкилий-ҳуқуқий шаклидан қатъи назар соғлиқни сақлаш тизимидаги ташкилотлар хизмат ва ходимларининг шахсий автотранспорт воситалари рўйхатдан чиқарилиб, давлат соғлиқни сақлаш тизимидаги тиббий-санитария ва эпидемиологик хизматлар кўрсатувчи ташкилотларнинг хизмат ва ходимларининг шахсий автотранспорт воситалари рўйхатда қолдирилди.

Мазкур рўйхатда хусусий тиббиёт муассасалари ходимларининг шахсий автотранспорт воситаларида ҳаракатланишларига рухсат этилмаган», – деди Адлия вазирлиги вакили.

Шунингдек, брифингда ҳуқуқни муҳофаза қилувчи органлар «ўзини яккалаш» ҳаёт тарзига риоя қилишни талаб қилишга ҳақли ёки ҳақли эмаслиги бўйича берилган саволга жавобан: «Ўзини яккалаш» ҳаёт тарзи «Аҳолининг санитария-эпидемологик осойишталиги тўғрисида»ги қонун ва ҳукуматнинг 176-сон қарорига мувофиқ жорий этилгани боис, ҳуқуқни муҳофаза қилувчи органлар ва айнан ички ишлар органлари «Ички ишлар органлари тўғрисида»ги қонунга мувофиқ, фуқаролардан қонунчиликка риоя қилишларини, ҳуқуққа хилоф ҳаракатларни тўхтатишни талаб қилиш, бу талаблар бажарилмаган тақдирда уларни мажбурлаш чораларини қўллаш ҳуқуқига эга эканлиги айтилди.