Сирдарёда карантин қоидаларини бузган яна бир фуқаро 15 суткага қамалди

Ўзбекистонда 16 мартдан бугунги кунга қадар карантин қоидаларига амал қилмаслик билан боғлиқ жами 51 182 та ҳолат аниқланди. Карантин қоидаларини бузганлар орасида тиббий ниқобсиз кўчада юрганлар, рухсатномасиз транспорт воситасида ҳаракатланганлар, шунингдек, бемақсад велосипедда юрганлар аниқланиб, уларга нисбатан жарима белгиланган. Бу ҳақда ИИВ матбуот хизмати хабар бермоқда.

Сирдарё вилояти Сайхунобод туманида эса ички ишлар ходимларининг қонуний талабини бажармаган фуқарога 15 сутка маъмурий қамоқ жазоси тайинланди.

«Пахтакон» маҳалласи Олтин водий кўчасида яшовчи 1971 йилга туғилган Р.Б. карантин қоидаларини бузиб, ички ишлар ходимларининг қонуний талабини бажармай, майда безорилик содир этган. Унга нисбатан Маъмурий жавобгарлик тўғрисидаги кодекснинг 54, 183 ва 194-моддаларига асосан маъмурий баённома расмийлаштирилиб, Сайхунобод туман Маъмурий суди томонидан ҳукм чиқарилган.

Эслатиб ўтамиз, 5 апрель куни ҳам Сирдарёда карантин қоидаларини бузган фуқаро 15 суткага қамалган эди. 8 апрель куни эса яна Сирдарёда велосипедда бақир-чақир қилган фуқаро 15 суткага қамалган.

Қайд этилишича, энг кўп — 8169 та қоидабузарлик Тошкент шаҳрида қайд этилган. Тошкент вилоятида эса бундай ҳолатлар сони 6 995 тани ташкил этмоқда. Республика бўйича аниқланган қоидабузарликлар эса қуйидагича:

• Фарғона вилоятида – 6582 та ҳолат;
• Самарқанд вилоятида – 5100 та ҳолат;
• Қашқадарё вилоятида – 3933 та ҳолат;
• Сирдарё вилоятида – 3934 та ҳолат;
• Наманган вилоятида – 3105 та ҳолат;
• Андижон вилоятида – 3045 та ҳолат;
• Жиззах вилоятида – 2029 та ҳолат;
• Сурхондарё вилоятида – 1914 та ҳолат;
• Бухоро вилоятида – 2063 та ҳолат;
• Хоразм вилоятида – 1809 та ҳолат;
• Навоий вилоятида – 635 та ҳолат;
• Қорақалпоғистон Республикасида – 1869 та ҳолатни ташкил этмоқда.