Кеча, 11 апрель куни АОКА қошидаги махсус штабда ўтказилган брифингда Адлия вазирлиги бошқарма бошлиғи Ғайбулло Примов карантинга жойлаштирилган шахсларнинг телефонлари олиб қўйилиши билан боғлиқ чеклов нега жорий этилгани тўғрисида маълумот берди.
Унинг айтишича, асосан пластикдан тайёрланган телефонлар ва маълумот тарқатувчи бошқа воситалар ўзида инфекцияни сақлаш ва тарқатиш хусусиятига эга бўлгани боис, уларни карантин ҳудудига олиб кириш санитар қоидаларга зид келади. Чунки инфекция қоғоз ва пластикнинг юзасида 3 кунда 5 кунгача сақланиб қолиши исботланган.
Шунингдек, вақтинча олиб қўйилган нарсалар фақат мазкур шахснинг касалланган ёки касалланиши эҳтимоли бўлган муддатда мулоқотда бўлган бошқа инсонларни ва ташриф буюрган жойларни аниқлаш мақсадидагина ўрганилади.
«Бунинг сабаби касаллик аниқланган фуқаролар касаллик юқтиргандан сўнг қаерларга борганини, кимлар билан мулоқотда бўлганини яширишлари ёки унутиб қўйишлари мумкин. Телефонлар уларнинг кимлар билан мулоқотда бўлганини, қаерга боришганини аниқлашга ёрдам беради», — дейди Ғайбулло Примов.
Унинг қўшимча қилишича, хорижий давлатларда ҳам бу каби амалиёт мавжуд. Бу, шунингдек, карантинга жойлаштирилган жисмоний шахсларнинг улар тўғрисидаги маълумотларни ҳимоя қилиш имконини ҳам беради.
Чунки карантинга жойлаштирилганларнинг шахсий маълумотларини муҳофаза қилиш бўйича қонуний чекловларга риоя қилинмаётган ҳолатлар ҳам мавжуд.
Бундан ташқари, Адлия вазирлиги вакили «Аҳолининг санитария-эпидемиологик осойишталиги тўғрисида»ги қонунга кўра, юқумли ва паразитар касалликлар ўчоқларида даволаш-профилактика ҳамда санитария-эпидемиология хизмати муассасалари томонидан юқумли ва паразитар касалликларнинг юқиш йўллари ва омилларини аниқлаш ҳамда уларнинг инсонга таъсир кўрсатишининг олдини олиш чораларини кўриш белгиланганини айтиб ўтди.
Шунингдек, карантинга жойлаштирилган коронавирус инфекцияси билан касалланган ёки ушбу инфекция бор деб, гумон қилинаётган шахсларнинг мобил телефонлари, аудио ва видеоёзув ускуналари, кредит карталари ва маълумот тарқатувчи бошқа воситаларини вақтинча олиб қўйиш Вазирлар Маҳкамасининг 2020 йил 23 мартдаги 176-сон қарори билан тасдиқланган низомда ҳам акс этганини, қонуний асосга эга эканини алоҳида таъкидлаб ўтди.
Изоҳ (0)