«Ҳеч қандай энг юқори чўққи бошланмади, биз ҳали унинг этагидамиз». Москва мэри шаҳардаги коронавирус ҳолати ҳақида

Москвада коронавирус инфекциясининг энг юқори чўққиси ҳали содир бўлгани йўқ. Бу ҳақда шаҳар мэри Сергей Собянинга таяниб, «РИА Новости» хабар берди.

«Сизларга шуни аниқ айта оламанки, ҳали ҳеч қандай юқори чўққи келгани йўқ, биз ушбу чўққининг этагидамиз, ҳатто ўртасида ҳам эмас», — дейди Собянин.

Мэрнинг сўзларига кўра, Москва «жиддий синовни енгиб ўтиши керак» ва унга тайёргарлик кўрмоқ лозим. Собяниннинг таъкидлашича, гап оммавий тестдан ўтказиш, тиббиёт тизимини тайёрлаш ва изоляция ҳамда карантин режимига риоя қилиш ҳақида кетмоқда.

«Биласизми, прогнозлар — гап пандемия ва вирус каби нарсаларнинг тарқалиши ҳақида кетганида ёқимли эмас. Олимлар, инфексионистлар қанча бўлса, шунча турфа хил прогнозлар бўлади. Шунинг учун энг яхши прогноз — бу бугунги кунда биз қила оладиган 100 фоиз иш», — дейди Собянин.

Аввалроқ Россия Федерал тиббий-биологик агентлиги раҳбари, собиқ соғлиқни сақлаш вазири Вероника Скворцова мамлакатда COVID-19 коронавируси инфекцияси 10-14 кундан кейин ўзининг энг юқори чўққисига чиқишини маълум қилган эди.

Сўнгги маълумотларга кўра, Россияда коронавирус билан касалланганлар сони 12 минг кишига яқинлашди, 94 киши вафот этди.