АҚШ Жанубий Кореянинг Эронга гуманитар ёрдам кўрсатишига рухсат берди. Бу ҳақда Yonhap агентлиги хабар қилди.
Таъкидланишича, АҚШнинг лицензиясини олгач Жанубий Корея санкциялар остига тушишдан қўрқмай, май ойида Эронга маҳсулот етказиб беришни қайта бошлаши мумкин. Биринчи навбатда, гап дори воситалари ва тиббий буюмлар ҳақида кетмоқда. Бунда Жанубий Корея томони етказиб берилган юклар белгиланган мақсадларда фойдаланилишини назорат қилиши керак бўлади.
Аввалроқ АҚШ Эроннинг коронавирусга қарши курашда ёрдам олишига халақит бериши мумкинлиги ҳақида маълумот пайдо бўлган. АҚШ Теҳрон томонидан сўралган Халқаро валюта жамғармасининг шошилинч кредитини тўхтатиб қўйиши мумкинлиги ҳақида хабар берилган. АҚШ президенти администрациясидаги манбаларнинг маълум қилишича, Эрон ҳукуматининг юқори мансабли амалдорлари бир неча марта ажратилган гуманитар ёрдамнинг бир қисмини ўзида олиб қолган.
Сўнгги маълумотларга кўра, Эронда коронавирусга чалинганлар сони 66 200 кишидан ошган, 32 минг киши соғайган, 4100 киши касалликдан вафот этган.
Бутун дунёда коронавирусга чалинганлар сони 1,6 миллион кишидан ошган. Касалликдан вафот этганлар 96 минг кишига етган. Тузалганлар сони эса 355 минг кишидан ортиқни ташкил этмоқда.
Маълумот учун, АҚШда ўтган бир сутка ичида 1904 киши коронавирус оқибатида вафот этди. Дональд Трамп АҚШда коронавирус ўзининг энг юқори чўққисига чиққанини маълум қилди.
Изоҳ (0)