Тошкент вилояти ИИББ ЙҲХБ ахборот хизмати ижтимоий тармоқлардан бирида тарқалган «Ўзбекистонда карантин бўлса-ю булар радар қўйиб ўтирибди. Шу ҳам инсофданми?» дея ёзган эътирози бўйича тушунтириш берди.
Тошкент вилояти ИИББ ЙҲХБга кўра, апрель ойининг дастлабки беш кунида вилоят ҳудудида 2000 дан ортиқ тезлик талабларини бузган ҳайдовчилар аниқланган. Беш кун ичида ЙПХ инспекторлари томонидан Тошкент вилояти ҳудудида транспорт воситасини тегишли ҳужжатларсиз бошқарган 258 та ҳайдовчига нисбатан Маъмурий жавобгарлик тўғрисидаги кодексининг 135-моддасига асосан баённома расмийлаштирилган.
9 та ҳайдовчи инспекторларнинг тўхташ ҳақидаги қонуний талабини бажармаганлиги учун; 8 та ҳайдовчи тегишли рухсатнома олмасдан ойналарининг тусини ўзгартиргани учун жавобгарликка тортилган.
Карантин даврида транспорт воситасини маст ҳолда бошқариб юрган 12 нафар ҳайдовчи аниқланиб, уларга нисбатан тегишли чоралар кўрилган.
«Биринчи навбатда ‘Йўл ҳаракати қоидалариъга ҳамма бирдек амал қилишни ўрганиши лозим. Иккинчидан, карантин эълон қилиндими, бас, унинг талабларига оғишмай амал қилинг. Сабаби бу ҳазиллашадиган иш эмас. У бутун дунёни ташвишга солмоқда. Қонунларимиз ҳам, муқаддас динимиз ҳам касаллик даврида уйда ўтиришни тавсия, аниқроғи талаб қилаяпти.
Ўзини, оила аъзоларини ва ўзгаларни ҳурмат қиладиган инсонлар бу талабларни бажаришлари шарт. Уларга амал қилиш эса энг аввало саломатлигингизга путур етишидан асрайди. Қолаверса, қоидабузарлик содир этиб жаримага тортилишдан муҳофазалайди. Қай бири афзал эканлигини таъкидлаш шарт бўлмаса керак. Қандай хулоса қилиш эса ўзингизга боғлиқ. Бошқача қилиб айтганда, ‘биз айтдик, сиз хулоса қилинғ, – дейилади Тошкент вилояти ИИББ ЙҲХБ хабарида.
Мавзуга доир:
Изоҳ (0)