Сингапурда коронавирус биринчи бор белгиларсиз ташувчи орқали юқиши мумкинлиги тасдиқланди

Сингапурда ҳеч қандай касаллик белгилари кузатилмаган шахс орқали вирус юқиши билан боғлиқ биринчи ҳолат аниқланди. Бу ҳақда мамлакат Соғлиқни сақлаш вазирлиги ҳамда АҚШ касалликлар назорати ва профилактикаси марказига таяниб, The Straits Times газетаси хабар берди.

«Икки мамлакат экспертлари Сингапурда 23 январдан 16 мартга қадар COVID-19 коронавирусининг тарқалиш манбаларини ўрганган. Маълум бўлишича, камида ўн киши вирусни касаллик белгилари кузатилмаган ташувчилардан, хусусан, Ухандан келган икки туристдан юқтириб олган», — дейди Сингапур юқумли касалликлар департаменти директори Вермон Ли.

Мутахассисларнинг фикрича, коронавирусга чалинган одам касалликнинг дастлабки белгилари пайдо бўлишидан уч кун олдин вирусни бошқаларга юқтириши мумкин. Маҳаллий мутахассислар вируснинг бундай тарқалиши жиддий хавф туғдириши мумкинлигини айтмоқда, чунки ҳозирда кўрилаётган профилактика чораларининг аксарияти аллақачон аломатлари бўлганлар учун қўлланилади. Масалан, тана ҳарорати назорати, шамоллаш, йўтал ва бошқалар.

Соғлиқни сақлаш вазирлигининг таъкидлашича, ушбу босқичда энг муҳим нарса — ижтимоий масофаланиш, бошқалар билан алоқаларни минимумга тушириш.

Ҳозирда Сингапурда коронавирус билан касалланганлар мингдан ошган бўлиб, тўрт киши вафот этган.

Эслатиб ўтамиз, Хитой ҳукумати 1 апрелдан бошлаб коронавирус ҳеч қандай белгиларсиз тарқалаётгани ҳақида маълумот берди. Таъкидланишича, ўтган бир сутка ичида 302 кишига карантиндан жавоб берилган. Тест уларда вирус борлигини кўрсатган бўлса-да, бироқ касалликнинг ҳеч қандай белгилари аниқланмаган. Ҳозирда касаллик белгилари кузатилмаган 1367 нафар бемор назорат остида қолмоқда. Бутун дунё бўйлаб коронавирус билан касалланганлар сони миллион кишидан ошди, Ўзбекистонда эса касаллар сони 221 кишига етди. Тошкентда коронавирусга чалинган яна бир бемор ўзини уйда даволашга урингани аниқланди.