Нью-Йорк ҳукумати Хитойдан 17 минг дона ўпкани сунъий нафас олдириш аппаратларини сотиб олди, бироқ Американинг бошқа штатлари билан юзага келган рақобат сабаб аппаратларни қабул қилиб ололмади. Бу ҳақда Нью-Йорк губернатори Эндрю Куомога таяниб, «ТАСС» хабар берди.
«Штатимиз энг кўп — 17 минг дона сунъий нафас олдириш аппаратларини сотиб олди, бироқ аппаратлар етказиб берилмади. Чунки уларнинг барчаси Хитойдан олиб келинаётган эди, 50 та штат ўртасида рақобат юзага келган. Аризалар бўйича ‘уруш’ бўлганини тахмин қиляпман, кўпроқ пул таклиф қилган томон эса ғолиб бўлган», — дейди Куомо.
Губернаторнинг таъкидлашича, штатнинг коронавирус билан касалланган фуқароларини сунъий нафас олдириш аппаратлари билан таъминлашга мўлжалланган дастур тайёрланган. Куомонинг айтишича, икки беморга битта аппаратдан фойдаланиш, бу каби қурилмаларни талаб қиладиган жарроҳлик амалиётларини вақтинча тўхтатиш, шунингдек, шу турдаги барча қурилмаларнинг инвентаризациясини ўтказиш режалаштирилмоқда.
Нью-Йоркда коронавирус билан касалланганлар сони 92 381 кишига етган, ўтган бир сутка ичида 432 киши вирус оқибатида вафот этган (бутун мамлакат бўйлаб қурбонлар сони бир суткада мингдан ошган). АҚШда коронавирусдан вафот этганларнинг 40 фоизи Нью-Йорк ҳисобига тўғри келмоқда. Дунё бўйича коронавирусга чалинганлар сони 1 миллион кишидан ошди.
Аввалроқ Сербия президенти сунъий нафас олдириш аппаратларининг бозордаги «ўғирлиги» ҳақида гапирган эди.
Изоҳ (0)