Ўзбекистон 27,8 миллиард сўм эвазига Хитойдан 200 мингта тест-системаси ва 50 мингта бир марталик бош кийимли ҳимоя комбинезонини сотиб олди. Бу ҳақда Вазирлар Маҳкамаси «Дарё»га маълум қилди.
Умумий оғирлиги 20 тоннага яқин бўлган юк ҳарбий самолётда олиб келинган. Махсус рейсда Хитой тақдим этган 2,5 миллиард сўмлик ҳар хил турдаги тиббий буюмлар шаклидаги инсонпарварлик ёрдами ҳам келтирилган.
Маълум қилишларича, Вазирлар Маҳкамасининг тегишли қарорига асосан 31 март куни 16 миллиард сўмлик, 3 апрелда эса қўшимча 45 миллиард сўмлик тиббий техника ва ҳимоя воситалари сотиб олиниб, Ўзбекистонга олиб келинади.
«Хорижий тажрибани кенг ўрганган ҳолда, соғлиқни сақлаш ходимлари учун алоҳида 2-даражали, яъни ‘қизил зонаъга мўлжалланган махсус комбинезонларни харид қилишга ҳам эътибор қаратилган», — дейилади ҳукумат ахборотида.
Эслатиб ўтамиз, Президент Шавкат Мирзиёев 28 март куни ўтказилган видеоселектор йиғилишида Соғлиқни сақлаш ва Молия вазирликларига 300 мингта экспресс-тест ва 500 та сунъий нафас олдириш аппарати харид қилиш ҳақида топшириқ берган эди. Президент матбуот хизмати тестлар-системаларини Россия, Хитой ва Сингапурдан сотиб олиш кўзда тутилганини маълум қилган эди.
Аввалроқ, 28 март куни Хитойнинг мудофаа саноати компаниялари томонидан бир марталик стерил тиббий қўлқоплар, ҳимоя кўзойнаклари, юз учун филтрловчи ниқоблар, тана ҳароратини ўлчовчи термометрлар Ўзбекистонга инсонпарварлик ёрдами ёрдами сифатида етказиб бергани ҳақида хабар берилган эди.
Бундан ташқари, 18 март куни АҚШ томони коронавирус тарқалишига қарши кураш мақсадида Ўзбекистонга 10 мингта қўлқоп, 10,2 мингта ниқоб, 1400 та махсус халат, 200 та кўзойнак тақдим этгани, 27 мартда БАА Ўзбекистонга 8 тонна инсонпарварлик ёрдами юборгани ҳақида хабар берилган эди.
Изоҳ (0)