Андижонда тиббий кузатувга олинган 1735 нафар фуқаро хонадонига махсус белги ёпиштирилиб, уларнинг карантинда эканлигига ишора қилинмоқда, дея хабар беради «Дарё» мухбири Умиджон Мамарасулов.
Андижон ИИБ ахборот хизматининг аниқлик киритишича, мазкур тадбир вилоят аҳолисининг ҳаёти ва соғлигини муҳофаза қилиш мақсадида ўтказилмоқда.
«Карантин даврида намунали жамоат тартибини сақлаш, фуқаролар тинчлиги ва осойишталигини ҳамда хавфсизлигини таъминлаш, соғлом турмуш тарзини татбиқ қилиш мақсадида ҳуқуқни муҳофаза қилувчи органлар ҳам фаол иштирок этмоқда», — дейилади ИИБ ахборотида.
Андижон ИИБ ҳуқуқбузарликлар профилактикаси бошқармаси ташаббуси билан фуқаролар хонадонига ёпиштирилаётган эълонлар «Карантин қоидаларига амал қилинг!» деган ёзув билан бошланиб, тозаликка риоя қилиш, карантин қоидаларини бузиш оқибатлари ҳақида сўз боради.
Эслатиб ўтамиз, Соғлиқни сақлаш вазирлиги коронавирус инфекцияси билан касалланганлар сони 158 нафарга етганини хабар қилди.
Изоҳ (0)