Ички ишлар вазирлиги тизимидаги Миграция ва фуқаролик бўлимлари ҳамда Йўл ҳаракати хавфсизлиги давлат хизмати 24 мартдан бошлаб карантин сабабли фуқароларни қабул қилишни тўхтатди. Бу даврда паспорт режимини бузган ва авторанспорт воситасини техник кўрикдан ўтказмаган фуқаролар жаримага тортилмайди. Бу ҳақда ЎзА хабар бермоқда.
Агентлик томонидан маълум қилинишича, ички ишлар вазири ўринбосари Азизбек Икромов Ички ишлар бошқармалари бошлиқларига тавсиялар юборган. Уларга кўра, карантин даврида паспорт режимини бузганлик ва транспорт воситаларини техник кўрикдан ўтказмаганлик учун Ўзбекистон фуқаролари жаримага тортилмайди.
Миграция ва фуқароликни расмийлаштириш бўлимлари ва Йўл ҳаракати хавфсизлиги давлат хизмати 24 мартдан бошлаб махсус тавсиялар келмагунича Ўзбекистон фуқароларини, чет эл фуқаролари ва фуқаролиги бўлмаган шахсларни, шунингдек, юридик шахсларни қабул қилишни тўхтатди.
Маъмурий амалиёт, экспертизалар, транспорт воситаларини рўйхатдан ўтказиш ва техник кўрикдан ўтказиш билан боғлиқ ишлар вақтинча тўхтатилди.
Фавқулодда ҳолатларда (паспорт, рўйхатга олиш, виза, маъмурий амалиёт, имтиҳон олиш, транспорт воситаларини давлат рўйхатидан ва техник кўрикдан ўтказиш) фуқаролар алоҳида хоналарда санитария меъёрларига риоя қилган ҳолда ички ишлар органлари раҳбарининг рухсати билан қабул қилинади.
Миграция ва фуқароликни расмийлаштириш бўлимларига 24 мартдан кейин паспорт олиш, яшаш ҳуқуқини олиш, пропискани алмаштириш, расмийлаштириш, виза ва яшаш ҳуқуқини узайтириш учун мурожаат қилишни режалаштирган, аммо қабул тўхтатиб қўйилгани сабабли бу ишларни қила олмаган шахслар паспорт тизими қоидаларини бузган деб ҳисобланмайди. Уларга нисбатан маъмурий чоралар кўрилмайди.
Автотранспорт воситаларини давлат рўйхатидан ва техник кўрикдан ўтказмаган, шунингдек, жарималарни ўз вақтида тўламаган ҳайдовчилар вақтинча жаримага тортилмайди.
Аввалроқ Тошкент шаҳар ИИББ ва унинг бўлинмалари биноларида фуқаролар ва юридик шахсларни қабул қилиш вақтинча тўхтатилгани, нотариуслар, Давлат хизматлари марказлари ва ФҲДЁ идоралари 25 мартдан онлайн иш режимига ўтгани ҳақида хабар берилган эди. Шунингдек, Ўзбекистон ҳудудида 2020 йил 24 мартдан бошлаб жорий этилган коронавирус инфекцияси тарқалишига қарши кучайтирилган тартибга мувофиқ, жаҳон ахборот тармоғи ва телефон алоқаси учун тўловлар ўз вақтида амалга оширилмаганлиги сабабли мазкур хизматларнинг икки ой давомида ўчирилишига йўл қўйилмайди.
Изоҳ (0)