Наманган шаҳрига 26 март, пайшанба кунидан бошлаб кириш ва чиқиш тўхтатилади. Бу ҳақда «Дарё» мухбири Азизбек Абдувалиев хабар бермоқда.
Вилоят ҳокими Хайрулло Бозоровнинг бугун қабул қилган фармойишига мувофиқ, 2020 йил 26 март куни соат 00:01 дан бошлаб Наманган шаҳрига кириш ва Наманган шаҳридан республиканинг барча ҳудудлари, жумладан, вилоят туманларига ҳар қандай транспорт воситалари (автобус, микроавтобус ва енгил автотранспорт)да чиқиш тўхтатилади.
Бундан кўзланган мақсад коронавирус инфекциясининг вилоят ҳудуди бўйлаб тарқалишининг олдини олиш эканлиги билдирилган.
Ушбу чекловлар юк ташиш билан боғлиқ ҳолатлар, шунингдек, шаҳарда доимий яшовчи шахсларга Наманган шаҳрига кириш учун, вилоят марказидаги маҳаллий давлат ҳокимияти органлари, ҳуқуқ-тартибот идоралари, бошқарма, идора ва ташкилотларда меҳнат фаолиятини амалга ошираётган раҳбар ва ходимлар, шифокор ва ҳамширалар, санитария-эпидемиологик осойишталик маркази ходимлари ҳамда вилоят туманларига бириктирилган маъсул ходимларга нисбатан татбиқ этилмайди.
Фармойишга асосан, карантин даврида тартиб-интизом ва амалдаги қонунчилик талабларига риоя этилиши бўйича вилоят штаби тузилди. Мазкур штабга шаҳар ҳудудига кириш-чиқиш жойларини тепловизорлар ва антисептик воситалар билан жиҳозлаш, қўйилган чекловлар ҳамда карантин қоидаларини бузган шахсларга қонунчиликда белгиланган чоралар кўрилишини таъминлаш вазифалари юклатилди.
Эслатиб ўтамиз, 25 март ҳолати бўйича Ўзбекистонда COVID-19 коронавирусини юқтириб олганлар сони 60 нафарга етди. Инфекция Истанбулда бўлиб қайтган наманганлик фуқарода аниқланган. Айни пайтда у Наманган вилоят юқумли касалликлар шифохонасида даволанмоқда.
Изоҳ (0)