Самарқандда жиноят ишини расмийлаштирмаслик эвазига терговчига 500 доллар пора таклиф қилган шахс ушланди. Бу ҳақда ИИВ ҳузуридаги Тергов департаменти хабар берди.
Маълум бўлишича, 18 март куни ўғирлик жиноятини содир этганли юзасидан қўзғатилган жиноят иши юзасидан Самарқанд вилояти Пахтачи туманида яшовчи бир неча фуқароларнинг уйлари ва ёрдамчи хўжаликларида тинтув тергов ҳаракати ўтказилган.
Тинтув давомида 43 ёшли З.Ж.нинг уйидан таркибида олтин моддаси бўлиши мумкин бўлган 950 килограмм тошлар борлиги аниқланиб, жиноят иши бўйича тергов гуруҳига жалб қилинган Самарқанд вилояти ИИБ Транспортда хавфсизликни таъминлаш бошқармаси ҳузуридаги Тергов гуруҳи катта терговчиси томонидан тегишли тартибда ҳужжатлаштириб олинган.
Фуқаро З.Ж. эса терговчига ҳолатни расмийлаштирмасликни, бунинг эвазига 500 доллар қийматидаги пулни пора сифатида таклиф қилган, лекин терговчи унга бу ҳаракати ноқонунийлигини тушунтиришига қарамасдан фуқаро бу фикридан қайтмаган.
Терговчи ўзининг уяли алоқа воситасига З.Ж. билан ўрталарида бўлиб ўтган суҳбатни ёзиб олган ва уни ДВД дискка кўчириб, З.Ж.га нисбатан қонуний чора кўришликни сўраб, вилоят ИИБ бошлиғининг номига билдирги билан мурожаат қилган.
Мазкур билдирги асосида 2020 йил 18 март куни тахминан соат 15:00 ларда ИИВ ўз хавфсизлиги бошқармаси Самарқанд вилоят бўйича бўлими ходимлари томонидан ўтказилган тезкор тадбир давомида фуқаро З.Ж. Нарпай туман ИИБ ҳузуридаги Тергов бўлими ходимларининг хизмат хонасида 7 миллион сўм миқдоридаги пулларни терговчига пора тариқасида берган вақтда тадбир иштирокчилари томонидан ашёвий далиллар билан ушланган.
Ҳолат юзасидан Нарпай туман прокуратураси томонидан фуқаро З.Ж.га нисбатан Жиноят кодексининг 211-моддаси 1-қисми (пора бериш) билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)